Բարդ դիլեմա
ՎԵՐԼՈՒԾՈՒԹՅՈՒՆՆԵՐ
Համաձայնե՛ք՝ Հայաստանում կառավարման արդյունավետության ու օպտիմալության, օրենսդրական ճշգրիտ դաշտ ձևավորելու և ապագային միտված բարեփոխումների մասին խոսելն այսօր, առնվազն, զավեշտական է։ Բայց եթե մենք ուզում ենք մեր երկիրը դուրս բերել այս ծայրահեղ անհուսալի ճգնաժամային վիճակից, պետք է հասկանանք, թե ինչ է «թողել» Նիկոլ Փաշինյանի իշխանությունը՝ մեզ որպես «ժառանգություն», և ինչու ենք պնդում, որ նա պետք է հեռանա, որպեսզի շանս ստեղծվի այս ճգնաժամը հաղթահարելու։ Ակնհայտ է, որ յուրաքանչյուրը, անշուշտ, ինքն իր համար ունի այն հարցի պատասխանը, թե ինչ է տվել այս իշխանությունը երկրին և անձամբ՝ իրեն։ Եվ այդ պատասխանները կարող են ծայրահեղ տարբեր լինել։ Մեկի համար սա մի հոծ սև գիծ է և չարիքների ու անկումների անվերջանալի երեք տարի, որտեղ թվարկելի են համակարգային փլուզումները, արժեհամակարգային նահանջները, մահերն ու ավերը, կորուստներն ու հետընթացը տարբեր ոլորտներում։
Մյուսի համար պատկերը բոլորովին այլ է, և նա, հնարավոր է, ունի իր «ճշմարտությունը»։ Ասենք՝ ճանապարհներ են կառուցվել, բանակում սնունդն է լավացել, «հաբռգած» հարևանն այլևս վերևից չի նայում իրեն, իր համար ատելի մարդիկ դատվում են կամ բանտում են հայտնվել, երկրի ղեկավարը պարբերաբար լայվեր է անում և ասում, որ սիրում է իրեն՝ ժողովրդին։ Գուցե էլի կան բաներ, որոնք մեզ համար տեսանելի չեն։ Անգամ հնարավոր է, որ այս փաստարկների մեջ նաև որոշ ճշմարտություն կա, և մենք չէ, որ պետք է դատենք այսպես մտածողներին։ Մենք միայն կարող ենք հորդորել՝ ձեր սեփական տան պատուհանից մի նայեք երկրին ու նրա ապագային։ Կարողացեք մոռանալ հին վիրավորանքները, կենցաղային նախանձով ու մակերեսային շահով մի առաջնորդվեք։
Անդրանիկ Կիրակոսյան
