Հայաստանի ձյուդոյի հավաքականը ուղևորվել է լեռներ մարզումների համար
ՍՊՈՐՏ
mir24.tv-ն գրում է, որ ձյուդոյի Հայաստանի ազգային հավաքականը սկսել է նախապատրաստվել մրցաշարի, որը կարող է ըմբիշների համար ճանապարհ բացել դեպի Տոկիոյի Օլիմպիական խաղեր: Թիմը այդ նպատակով մարզվում է բարձր լեռնային պայմաններում:
Ցրտաշունչ առավոտ է Ծաղկաձորի լեռներում: Սկզբից վազք անտառային արահետներով, ապա դահուկներ: Այդպես է ամեն օր սկսվում ձյուդոյի Հայաստանի ազգային հավաքականի մարզումը: Այս ամենի նպատակն է հասնել օպտիմալ ֆիզիկական վիճակի:
«Նոսրացված օդը, լեռներում մարզվելը զարգացնում է դիմացկունություն, շնչառություն ակտիվացում, սրտի աշխատանքի ուժեղացում: Մեկ ամսից ազգային հավաքականը կմասնակցի «Մեծ սաղավարտի» մրցաշարին, որից հետո պարզ կդառնա թե քանի օլիմպիական խաղերի ուղեգիր կլինի», - ասել է Հայաստանի ձյուդոյի ազգային հավաքականի գլխավոր մարզիչ Հովհաննես Դավթյանը:
Հաջորդ փուլը դասերն են մարզադահլիճում: Ուժային վարժություններ, կրոսսֆիտ, ծանրամարզում, ձգման վարժություններ:
«Բարձրադիր պայմաններում մարզվելը հեշտ չէ: Այստեղ դժվար է շնչել: Բայց մյուս կողմից, կայունությունը, աշխատունակությունը, համակարգումը լավ են զարգանում, որն էլ շատ է օգնում գոտեմարտի ընթացքում»,- ասել է ձյուդոյի Հայաստանի ազգային հավաքականի անդամ Երվանդ Ներսիսյանը:
Այս ուսումնամարզական հավաքներում հայ ձյուդոիստները զբաղվում են միայն ֆունկցիոնալ մարզումներով: Տեխնիկայի և ուսումնամարզական մենամարտերի վրա աշխատանքը կսկսվի Երևան վերադառնալուց հետո:
«Համաճարակի պատճառով մենք բաց ենք թողել բազմաթիվ մրցաշարեր և մարզումներ ենք անցկացրել սահմանափակումներով: Այժմ մենք սկսել ենք լիարժեք նախապատրաստվել: Սա օլիմպիական տարի է, և մենք ամեն ինչ անելու ենք, որպեսզի համարժեք ելույթներ ունենանք այդ խաղերում», - ասել է Հայաստանի ձյուդոյի ֆեդերացիայի փոխնախագահ Թաթուլ Հովհաննիսյանը:
Մարզումները շատ էներգիա են խլում: Հետևաբար, մարզիկների ամենօրյա սննդակարգում բարձր կալորիականությամբ սնունդ է: Բազմաթիվ մսային ուտեստներ, աղցաններ, կաթնամթերք, մրգեր, իսկ ճաշից հետո անհրաժեշտ է հանգստանալ, ինչը օգտակար է երեկոյան մարզումից առաջ:
Նյութը հրապարակման պատրաստեց Կամո Խաչիկյանը
