Ռուս-թուրքական կենտրոնում ամեն ինչ համատեղ է
ՀԱՍԱՐԱԿՈՒԹՅՈՒՆ
tvzvezda.ru-ն գրում է, որ Լեռնային Ղարաբաղում զինադադարի վերահսկման ռուս-թուրքական դիտորդական կենտրոն է ստեղծվել շփման գծից ոչ հեռու գտնվող ադրբեջանական Կիամադդինլի բնակավայրում:
Կենտրոնում զինծառայողները լինելու են հավասարության սկզբունքով` 60 ռուս և 60 թուրք զինծառայող: Նրանք կապրեն նորակառույց բլոկ-մոդուլային քաղաքում, որտեղ ծառայության համար կա ամեն ինչ:
Համատեղ կենտրոնի հիմնական խնդիրն է կանխել Ղարաբաղում հակամարտության կրկնակի սրացումը: Հիմնական շեշտը դրված է օդային մոնիտորինգի վրա: Կենտրոնի հրամանատարական կենտրոնից ուղղակի կապ է հաստատված հակամարտության կողմերի՝ Հայաստանի և Ադրբեջանի ռազմական շտաբերի և ռուս խաղաղապահների շտաբի հետ: Իրավիճակը, այդ թվում անօդաչու թռչող սարքերով, վերահսկվելու է համատեղ, պատկերը ցուցադրվելու է հատուկ մոնիտորների վրա:
Ռուս-թուրքական կենտրոնում ամեն ինչ համատեղ է, և նույնիսկ բուժկետում ռուս բժիշկներն ու նրանց թուրք գործընկերները կողք կողքի աշխատում են նույն սենյակում: Ե՛վ նրանք, և՛ մյուսները օգնություն են ցուցաբերում բոլոր զինվորականներին:
Բացի բնակելի միավորներից, ռազմական քաղաքն ունի ճաշարան, լվացքատուն, աղոթասրահ և ժամանակակից մարզադահլիճ: Ռուսաստանի և Թուրքիայի զինված ուժերի միջև խոչընդոտներ չեն մնացել, բացի լեզվականից, բայց ժամանակի հետ դա էլ կհաղթահարվի:
Նյութը հրապարակման պատրաստեց Կամո Խաչիկյանը
