Իսրայելում հայտնաբերել են կորոնավիրուսի վտանգավոր նոր շտամ
ՀԱՍԱՐԱԿՈՒԹՅՈՒՆ
lenta.ru-ն գրում է, որ Իսրայելում հայտնաբերվել է կորոնավիրուսի նոր մուտացիա, որը կարող է առանձնահատուկ վտանգ ներկայացնել: Այս մասին հայտնել է թուրքական Anadolu գործակալությունը` հղում անելով իսրայելական լրատվամիջոցներին:
Ինչպես նշվել է, նոր վտանգավոր շտամի առկայությունը հայտնի է դարձել Իսրայելի ռազմական հետախուզական գործակալության (AMAN) զեկույցից: Փաստաթղթում պնդում են, որ նոր մուտացիան տարածման ավելի բարձր մակարդակ ունի բնակչության շրջանում: Այդ առումով, յուրաքանչյուր անձ, որը այլ երկրներից է ժամանում Իսրայել, պետք է կրկնակի կարանտինի ենթարկվի: Բացի այդ, առաջիկայում վարչապետ Բենյամին Նեթանյահուն նախատեսում է երկրի առողջապահության նախարարության և կառավարությանն առընթեր ազգային անվտանգության խորհրդի հետ քննարկել Թել Ավիվում գտնվող «Բեն Գուրիոն» օդանավակայանը երկու շաբաթով փակելու հնարավորությունը:
2020 թվականի դեկտեմբերի սկզբից հայտնի է դարձել Մեծ Բրիտանիայում, Հարավային Աֆրիկայում և Բրազիլիայում SARS-CoV-2 վիրուսի նոր մուտացիայի ենթարկված շտամների առաջացման մասին: Վիրուսի այս տարբերակները, կարծես, ավելի հեշտությամբ են տարածվում, և դա կարող է հանգեցնել դեպքերի, մահերի և հոսպիտալացման դեպքերի աճի:
Նյութը հրապարակման պատրաստեց Կամո Խաչիկյանը
