Ճանապարհի մերկասառույցի պատճառով Կոտայքի մարզում Նոյեմբերյանի բժշկական կենտրոնի շտապօգնության ավտոմեքենան կողաշրջվել է

Ըստ shamshyan.com այսօր՝ հունվարի 20-ին, ճանապարհի մերկասառույցի պատճառով հերթական խոշոր ավտովթարն է տեղի ունեցել Կոտայքի մարզում: Ժամը 17:10-ի սահմաններում Երևան-Սևան ավտոճանապարհի 21-րդ կմ հատվածում, Չայնիի ոլորանների սկզբնամասում մերկասառույցից չմշակված ճանապարհին Ford մակնիշի շտապօգնության ավտոմեքենան դեպի Սևան ընթանալիս դուրս է եկել երթևեկելի գոտուց, բախվել երկաթե արգելապատնեշներին և մոտ 10 կողաշրջված վիճակում սահելով հայտնվել հանդիպակաց երթևեկելի գոտում:

Դեպքի վայր են ժամանել Արտակարգ իրավիճակների նախարարության փրկարար ծառայության Կոտայքի մարզային փրկարարական վարչության հրշեջ-փրկարարական ջոկատն ու ԱԻՆ հատուկ նշանակության փրկարարական աշխատանքներ իրականացնող ջոկատի փրկարարները:


Օպերատիվորեն ժամանել են նաև ճանապարհային ոստիկանության 2-րդ սպայական գումարտակի 3-րդ վաշտի 1-ին դասակի ծառայողները՝ վաշտի հրամանատար Արթուր Պետրոսյանի, դասակի հրամանատար Տիգրան Քոթանջյանի գլխավորությամբ:

Ժամանել են նաև նույն վաշտի ավագ հետաքննիչներ Ավետիք Ավետիսյանը, Մայիս Բադոյանն ու Միշա Ստեփանյանը:

Վերջիններս պարզում են՝ արդյոք վթարի հետևանքով տուժած կամ տուժածներ կան, թե ոչ:

Փաստի առթիվ նույն վաշտի ավագ հետաքննիչ Կառլեն Բաղյանի կողմից նյութեր են նախապատրաստվում:

Պարզվում է նաև, թե որ բժշկական կենտրոնի հաշվեկշռում է հաշվառված նշված ավտոմեքենան:

Գ. Շամշյանի տեղեկություններով՝ այն պատկանում է Նոյեմբերյանի բժշկական կենտրոնին:

***
18:30

Քիչ առաջ ավագ հետաքննիչ Կ. Բաղյանը պարզեց, որ վթարի հետևանքով շտապօգնության վարորդն ու բուժքույրը նախ տեղափոխվել են «Չարենցավան» բժշկական կենտրոն, որտեղից էլ՝ Երևանի Միքայելյանի անվան վիրաբուժության ինստիտուտ:

Ոստիկանությունը պարզում է վարորդի և վիրավորի ինքնությունը:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: