Աշխատանքային հարցազրույցների ընթացքում թույլ տրվող հինգ հիմնական սխալները

Woman.ru-ն նշել է հինգ հիմնական սխալները, որոնք թույլ են տալիս մարդիկ՝ աշխատանքային հարցազրույցների ժամանակ: Ստորև ներկայացնում ենք դրանք:

1. Ուշադրություն դարձրեք արտաքին տեսքին

Հարցազրույցի գնալիս հաստիքին համապատասխան հագուստ կրեք, որը վառ գույներով չի առանձնանա: Ուշադրություն դարձրեք նաև կոկիկությանը. էժան, արդուկված հագուստը գերադասելի է թանկարժեք, բայց վատ վիճակում գտնվող հագուստից: Հագուստը և կոշիկը պետք է մաքուր լինեն: Դիմահարդարումը չպետք է շատ վառ լինի, մի՛ մոռացեք նաև օծանելիքի չափավոր օգտագործման մասին:

2. Հետևեք էթիկայի կանոններին

Հարցազրույցից առաջ անջատեք հեռախոսը: Զրույցի ընթացքում մի՛ ընդհատեք խոսողին, եղեք հարգալից: Անպայման մտապահեք և ճիշտ արտաբերեք զրուցակցի անունը և ընկերության անվանումը:

Կոպիտ սխալներից մեկը մաստակ ծամելն է: Խորհուրդ չի տրվում աջակցության խմբով գնալ հարցազրույցի:

Անմիջականությունը լավ է, բայց հիշեք, որ հանդիպումը պաշտոնական բնույթ է կրում:

3. Մի՛ ստեք Ձեր հմտությունների և կարողությունների մասին

Եթե Ձեր հմտությունների և կարողությունների մասին ստեք, հնարավոր է, որ չկարողանաք ապացուցել դրանց առկայությունը: Այդ դեպքում Դուք ոչ միայն չեք ընդունվի աշխատանքի, այլև ստելու պատճառով ամոթի այրող զգացում կունենաք:

Շատերը նշում են այնպիսի հմտություններ, որոնք իրենց մոտ բացակայում են՝ համոզված լինելով, որ աշխատանքի ընթացքում ձեռք կբերեն դրանք: Այդ դեպքում ավելի լավ է անկեղծորեն ասել, որ տվյալ հմտությունը չունեք, բայց արագ ձեռք կբերեք:

4. Մի՛ բողոքեք նախկին ղեկավարից

Հարցազրույցի ընթացքում գնահատում են ոչ միայն Ձեր հմտությունները, այլև նախկին աշխատանքային փորձը: Եթե նախորդ աշխատանքային փորձի մասին պատմելիս բողոքեք Ձեր նախկին ղեկավարից և (կամ) նշեք, որ ամեն ինչ ինքներդ եք արել, և որ նա մասնագետ չէր, ապա պոտենցիալ գործատուն կարող է կարծել, որ իր մասին նույնպես նման կերպով կարտահայտվեք:

Ձեր փորձից անկախ՝ կենտրոնացեք դրական կողմերի վրա, խոսեք Ձեր ձեռքբերումներից. Նշեք, որ շնորհակալ եք նախկին գործընկերներին՝ ձեռք բերված փորձի և հմտությունների համար:

5. Ընկերության նկատմամբ հետաքրքրություն ցուցաբերեք

Պարզելուց հետո՝ արդյո՞ք Դուք պետք եք ընկերությանը, գործատուն փորձում է պարզել՝ արդյո՞ք Ձեզ պետք է ընկերությունը: Եթե ընկերության նկատմամբ թույլ հետաքրքրվածություն ցուցաբերեք, Ձեզ, հավանաբար, կմերժեն, քանի որ ցանկանում են, որ թափուր տեղը երկար ժամանակով զբաղեցվի: Կարող եք նշել՝ ինչ կարող եք տալ ընկերությանը, ինչու եք որոշել գնալ հարցազրույցի և այլն:

Ավելին...