Շիրակի մարզում եղբայրը կտրել է քրոջ հեռախոսին մի քանի անգամ զանգահարած տղայի ականջն ու շպրտել ձյան մեջ

1in.am-ը գրում է.

Շիրակի մարզի ընդհանուր իրավասության դատարանում  Արտակ Թադևոսյանի նախագահությամբ ավարտվել է Արմեն Հ.-ի գործի դատական քննությունը:

Ըստ մեղադրանքի՝ 2016 թվականի փետրվարի 16-ին, առավոտյան ժամը 11-ն անց 30-ի սահմաններում Շիրակի մարզի Առափի գյուղի վարչական տարածքում՝ չգործող «Թաք ծառ» ռեստորանի դարպասի դիմաց գտնվող տարածքում Արմեն Հ.-ն Արթուր Տ.-ի կողմից իր քրոջ բջջային հեռախոսին մի քանի անգամ զանգելու պատճառով վիճել է Արթուրի հետ:

23-ամյա Արմենը, ըստ մեղադրանքի, «Արթուրին ծնկի է բերել, գրպանից հանել է դանակը, շեղբի մասով մոտեցրել է Արթուր Տ.-ի կզակին, առանձին դաժանությամբ՝ առանձնակի ֆիզիկական և հոգեկան տառապանքներ պատճառելով վերջինիս՝ դանակով կտրել է նրա աջ ականջը՝ պատճառելով աջ ականջախեցու տրավմատիկ անդամահատում և պարանոցի կտրած վերք՝ դիտավորությամբ առողջության տևական քայքայումով միջին ծանրության վնաս է պատճառել Արթուր Տ.-ին:

Արմեն Հ.-ին մեղադրանք էր առաջադրվել ՀՀ քրեական օրենսգրքի 113 հոդվածի 2-րդ մասի 5-րդ, 6-րդ կետերով:

Դատարանում Արմեն Հ.-ն իրեն մեղավոր է ճանաչել մասնակիորեն, հրաժարվել է ցուցմունքներ տալուց և հարցերին պատասխանելուց:

Դատարանում հրապարակվել ու հետազոտվել են Արմենի նախաքննական ցուցմունքները:

Արմենը պնդել է, որ արարքը խուլիգանական դրդումներով և աննշան պատճառով չի կատարել, իր անձի առավելությունը չէ, որ տուժողին ցույց է տվել: Այդ քայլին գնացել է այն պատճառով, որ Արթուր Տ.-ն անհանգստացրել է իր քույրիկին, վերջինիս պատվի ու արժանապատվության հարցն է շոշափվել: Բացի այդ՝ Արթուր Տ.-ն իրենից ներողություն չի խնդրել կատարածի համար: Քրոջ պատվի ու արժանապատվության հարցը չնչին առիթ չէր իր համար: Ինքն Արթուրին հոգեպես չի ճնշել, ծնկի չի իջեցրել: Փոխադարձ վեճի ժամանակ իրար չեն հասկացել:

Ինքը, առանց որևէ դաժանության ու հոգեկան ճնշում կիրառելու, խոսակցային վեճի ժամանակ գրպանից հանել է դանակն ու միանգամի՛ց կտրել է Արթուրի ականջը: Նա այդ պահին կանգնած էր, ոչ թե ծնկի իջած… Ինքը Արթուրի պարանոցը դիտավորյալ չի վնասել, վնասվածքը երևի առաջացել է ականջը կտրելու ընթացքում դանակը ներքև սահելու ժամանակ…

Արմենը հայտնել է, որ հոգեպես առողջ է, որևէ հիվանդանոցում հաշվառված չէ: Ինքն ու եղբայրը Հայաստանում մշտական աշխատանք չունեն, մեկնում են ՌԴ Սախալին քաղաք՝ արտագնա աշխատանքի: Իրենց ընտանիքը նյութապես ապահովված է:

Մոտ տասը տարի առաջ քույրն ամուսնացել է: Ամուսնական կյանքի ընթացքում նա մեկ տղա է ունեցել, ով ի ծնե հիվանդ է: Երեխայի ծնվելուց հետո քույրն առողջական խնդիրներ է ունեցել և 2013 թվականին ամուսնալուծվել է: Երեխան մնացել է հոր մոտ, քույրը տեղափոխվել է իրենց տուն: Ինքը տեղյակ է եղել, որ քույրը համացանցի «Ֆեյսբուք», «Օդնոկլասնիկի» կայքերից օգտվել է, շփվել է բարեկամների հետ:

Դեպքից մոտ մեկ ամիս առաջ քրոջ պլանշետն իր մոտ է եղել, այնտեղ տեղադրված էր քրոջ հեռախոսաքարտը:  Նրա համարին զանգ է եկել: Ինքն է պատասխանել: Խոսողը տղամարդ է եղել: Նա, իր ձայնը լսելով, ասել է՝ կներեք, սխալվել եմ, ու անջատել է հեռախոսը:

Ինքը քրոջը հարցրել է՝ ո՞վ էր զանգողը: Քույրն ասել է, թե չգիտի:

2016 թվականի փետրվարի 15-ին, ժամը 23-ի սահմաններում կրկին քրոջ պլանշետն իր մոտ է եղել, քրոջ համարին զանգ է եկել: Զանգողը տղա է եղել: Իր ձայնը լսելով՝ ասել է, թե սխալվել է, ուզում էր ընկերոջը զանգել:  Ինքը պահանջել է, որ նա իրեն տա այդ ընկերոջ համարն ու ասի նրա անունը: Այդ տղան չի ասել: Ինքը հարցրել է զանգողի անունը: Տղան ասել է՝ Արթուր: Իմացել է, թե որ թաղամասում է նա ապրում: Ի վերջո տղան ճիշտն է ասել՝ որ զանգել էր իր քրոջ հետ խոսելու:

Ինքը խոսել է քրոջ հետ, վերջինս ասել է, թե այդ տղան իրեն գրել ու զանգել է, չնայած ինքը միշտ պահանջել է, որ նա չգրի ու չզանգի:

Այդ ընթացքում քրոջը նորից զանգել ու չեն խոսել:

Ինքը Արթուրին զանգել ու պայմանավորվել է, որ հաջորդ օրը հանդիպեն ու խոսեն՝ պարզելու համար, թե որն է նրա զանգերի իմաստը:

Հաջորդ օրը ժամը 10-ին ինքը տանից դուրս է եկել: Բաճկոնի գրպանում դանակ կար, որը դեպքից  2 օր առաջ էր գնել՝ որպես հուշանվեր:

Ինքը զանգել է Արթուրին, պայմանավորվել են հանդիպել Գյումրիի «Իսուզ» հյուրանոցի մոտ: Արթուրը մոտեցել ու նստել է իր մեքենան: Նա մենակ է եղել, ինքը՝ նույնպես:

Ինքը մեքենան վարել է «Թաք ծառ» ռեստորանի մերձակայքը, որտեղ համեմատաբար ամայի վայր է:  Արթուրն ասել է, թե նախկինում քրոջ հետ հեռախոսով խոսել է, զանգում էր՝ պարզապես իմանալու, թե նա ինչպես է:

Ինքը նրան ասել է. «Որ քույրս ասել է՝ մի՛ զանգի, ինչի՞ ես նորից զանգում, ա՛յ հարիֆ»: Նա իրեն պատասխանել է. «Հարիֆը դու ես»:

Ինքը պահանջել է, որ նա իջնի մեքենայից: Ինքն էլ է իջել: Բորբոքված խոսել են: Արթուրն իրեն վիրավորական խոսք է ասել: Ինքը միանգամից նյարդայնացել է, բաճկոնի աջ գրպանից հանել է դանակն ու փականքը բացել է:

Արթուրը ձեռքերն առաջ է պարզել՝ պաշտպանվելու համար: Ինքն էլ ձեռքը բարձրացրել ու միանգամից աջ ձեռքով խփել է նրա աջ ականջին: Ականջը միանգամից կտրվել ու ընկել է նրա ուսին: Ինքն էլ վերցրել է Արթուրի ականջը ու մի կողմ է շպրտել՝ ձյան մեջ: Արթուրը բղավել է ցավից: Կտրված տեղից արյուն է հոսել: Նա անկանոն բղավելով՝ վազվզել է տարածքում:

Ինքը մեքենա է նստել ու շարժվել է դեպի գլխավոր ճանապարհ, ապա գնացել է իրենց գյուղ: Երբ մեքենան տեղից պոկում էր, Արթուրի հետ չի խոսել, ինքը արդեն հասկացել էր իր սխալը ու, վախենալով, որ կարող է ոստիկանություն ընկնել, շտապել է հեռանալ այդ վայրից:

Երբ շարժվում էր, տեսել է, որ Արթուրը հեռախոսով խոսում է ինչ-որ մեկի հետ: Ինքը նկատել է, որ Արթուրը վազում է դեպի գլխավոր ճանապարհ: Ինքը ճանապարհին դանակը գցել է Ախուրյան գետը:

Երբ ինքը տուն է մտել, տնեցիներին ասել է, թե գնացել, քրոջը զանգողի ականջը կտրել ու եկել է: Չի ասել, թե որտեղ է դա արել:

Մի քանի րոպե մնացել է տանը, հետո գնացել է գյուղամեջ: Երբ տուն է վերադարձել, հայրն ասել է, որ իրենց տուն ոստիկաններ էին եկել, մորը, եղբորն ու քրոջը հրավիրել են բաժին:

Ինքը զանգել է մորը, ասել է, որ տանն է: Եկել են ոստիկանները, իրեն բաժին են տարել:

Արմենը հայտնել է, որ զղջում է կատարածի համար: Բայց այդ քայլն արել է «քրոջ պատիվը բարձր պահելու համար»: Բացի այդ, Արթուրն իրեն վիրավորական խոսք էր ասել:

Ի սկզբանե ինքը նպատակ չի ունեցել Արթուրին դանակով հարվածելու: Ուզում էր նրան բացատրել, որ քրոջը չզանգի, չգրի, չանհանգստացնի: Բայց իրար չեն հասկացել զրուցելիս, լարված վիճակ է ստեղծվել, ինքը ջղայնացել ու որոշել է կտրել Արթուրի ականջը, որպեսզի «նա հասկանա իրեն պատճառած ցավն ու նման քայլի այլևս չդիմի»:

Ինքը չի տեսել, որ նրա պարանոցը նույնպես վնասվել է: Դեպքի վայրում միայն կտրված ականջ է տեսել, որը կտրվելուց հետո ընկել է:

Ինքը դեպքի պահին սթափ է եղել: Ինքը ցանկացել է, որ Արթուրը հիշի կատարած վատ քայլը և ուրիշ աղջիկների հետ նման ստոր ձևով չվարվի, քանի որ «ստոր քայլ է՝ երբ աղջիկը չի ցանկանում շփվել, բացատրում է դա, բայց տղան հաշվի չի առնում աղջկա կամքն ու ինքնասիրությունը և շարունակում է քայլերը»:

Մինչև Արթուրի ականջը կտրելը ինքը դանակը նրա դեմքի  մոտ չի պտտել, դանակը հանել ու միանգամից հարվածել է ականջին…

Տուժող Արթուր Տ.-ն հայտնել է, որ մոտ մեկ տարի առաջ համացանցով սկսել է շփվել մի աղջկա հետ: Ինքը հարցրել է նրա հեռախոսի համարը, աղջիկը հաղորդագրությամբ ուղարկել է: Իրենք շփվել են հեռախոսով: Նա հայտնել է անունը, ասել է, որ ամուսնալուծված է, ապրում է ծնողների տանը:

Սկզբում շփվել են ամեն օր, հետո ավելի քիչ են շփվել:

2015 թվականի ամռանը աղջկա «Օդնոկլասնիկի» էջը փակվել է: Աշնան վերջին աղջիկն ասել է, թե եղբայրները Ռուսաստանից վերադառնում են, իրենք չեն կարող շփվել: Աղջիկն ասել է, որ երբ կարողանա խոսել՝ կգրի կամ կզանգի:

Մոտ չորս ամիս՝ մինչև 2016 թվականի փետրվար ամիսը, իրենք չեն շփվել:

Փետրվարի 10-ին էր երևի՝ ստույգ օրը չի հիշում, ինքը խոսել է աղջկա հետ, նա զգուշացրել է, որ եթե զանգի ու եղբայրը պատասխանի, ինքն ասի, թե սխալ է զանգել:

Փետրվարի 16-ին, կեսգիշերին մոտ ինքը զանգել է աղջկան, պատասխանել է տղամարդ, ինքն ասել է, որ սխալվել է, բայց տղամարդը՝ աղջկա եղբայրը, ի վերջո պարզել է, թե ում և ինչու է ինքը զանգում: Նա առաջարկել է հանդիպել:

Հանդիպել են պայմանավորված տեղում, ինքը նստել է նրա մեքենան, պատմել է իրականությունը: Արմենը պահանջել է, որ ինքը ճիշտն ասի, սպառնացել է, որ այլապես ինքը մեքենայից կենդանի չի իջնի:

Նա մեքենան քաղաքից դուրս է վարել, հասել են «Թաք ծառ» ռեստորանի մոտակայքը: Կանգնել են ամայի դաշտում:  Արմենն ասել է. «Խելոք, հարիֆ տղա ես, դրա համար էլ ուրիշ բան չեմ անում հետդ»:

Նա առաջարկել է իջնել մեքենայից: Ինքը ցանկացել է գլխարկը վերցնել ու նոր իջնել, Արմենն ասել է, թե գլխարկը վերցնելու կարիք չկա, կիջնեն, մի փոքր կքայլեն, կխոսեն ու հետ կգնան:

Քայլել  են դեպի մեքենայի հետնամաս: Ինքը բազմիցս ներողություն է խնդրել, ասել է, որ աղջիկն ինքնակամ է տվել հեռախոսի համարը, հետը խոսել է, ինքը նրան չի վիրավորել, չի պարտադրել:

Բայց Արմենն իր խոսքերը չի ընդունել: Նա պնդել է՝ իբր ինքը քրոջ համարը տվել է ուրիշ տղաների, ովքեր նույնպես զանգահարել ու չեն խոսել: Ինքը բացատրել է, որ նման բան չի եղել, նա չի հավատացել:

Արմենն իր վրա հոգեկան ճնշում է գործադրել, պահանջել է, որ ինքը ծնկի գա: Ինքը վախեցել, ծնկի է իջել: Նա կանգնել է իր դիմաց: Գրպանից դանակ է հանել, բացել ու սուր մասը մոտեցրել է իր կզակին, կպցրել է դեմքին, հետո ոչինչ չասելով՝ բռնել է իր աջ ականջը ու դանակով կտրել է:

Ինքը չի դիմադրել, եղել է հուզված ու ճնշված վիճակում: Նրա ձեռքին դանակ կար, ինքը վախենում էր, որ նա իրեն նորից հարվածներ կհասցնի: Արմենը կտրել է իր ականջը, գցել է մի կողմ՝ ձյան մեջ, ապա իրեն դաշտում թողնելով անօգնական վիճակում, նստել է մեքենա ու հեռացել է:

Ինքն իր մոտ եղած թաշկինակով բռնել է կտրված ականջի տեղը, որ շատ չարնահոսի, զանգել է ընկերոջը, խնդրել է, որ նա գա իրեն օգնության: Ինքը սկսել է վազել դեպի քաղաք:

Ճանապարհին հանդիպել է ընկերոջը: Իրեն մեքենայով տեղափոխել են նախ մոտակա ավտոտեխսպասարկման կետ, այնտեղ է եկել հայրը, հետո իրեն տեղափոխել են հիվանդանոց, որտեղ վիրահատել են…

Տուժողը հայտնել է, որ Արմենի հետ հաշտվել է, նրանից բողոք կամ պահանջ չունի, խնդրում է մեղմ պատժել:

Արթուրն այնքան խառնված ու վախեցած է եղել, որ ձյան միջից չի վերցրել կտրված ականջը…

Արթուրի հայրը, որդուն հիվանդանոց տեղափոխելուց հետո, գնացել է դեպքի վայր, որ կտրված ականջը գտնի, բայց  այդպես էլ չի գտել, միայն ձյան վրա արյուն է տեսել…

Դատարանում հարցաքննված դատաբժիշկ փորձագետը հայտնել է, որ ականջախեցու՝ արտաքին ականջի բացակայությունը ազդում է լսողության վրա, սակայն  ամբողջությամբ ականջը չի խլանում: Տվյալ դեպքում ֆունկցիայի «չնչին կորուստ է եղել», միայն արտաքին ականջն է վնասվել:

Դատագեղագիտական փորձաքննության եզրակացությամբ՝ ականջախեցու տրավմատիկ անդամահատումը ունի բացասական ազդեցություն դեմքի ընդհանուր գեղագիտական և արտահայտչական ընկալման հատկանիշների վրա:

Դատարանում հարցաքննված փորձագետը մասնավորապես ասել է, թե ականջախեցու բացակայությունը մարդու պատկերին վանող տեսք է տալիս, տհաճություն է պատճառում և տհաճությամբ ուշադրություն է գրավում, բայց դեմքի անջնջելի այլանդակում չի համարվում, քանի որ ականջախեցին դեմքի մաս չի համարվում՝ դեմքի սահմանագծից դուրս է:

Դատարանը հաստատված է գնահատել, որ Արմեն Հ.-ն կատարել է իրեն մեղսագրված արարքը՝ խուլիգանական դրդումներով և առանձնակի դաժանությամբ առողջության տևական քայքայումով միջին ծանրության վնաս է պատճառել տուժողին:

Արմեն Հ.-ն մեղավոր է ճանաչվել ՀՀ քրեական օրենսգրքի 113 հոդվածի 2-րդ մասի 5-րդ, 6-րդ կետերով  և դատապարտվել է 3 տարի ազատազրկման:

Պատժի սկիզբը՝ 2016 թվականի փետրվարի 16-ից: