Ծաղկեդրում՝ ի հիշատակ լեգենդար Արկադի Անդրեասյանի
ՀԱՍԱՐԱԿՈՒԹՅՈՒՆ
Դեկտեմբերի 24-ին «Արարատ-73»-ի ֆուտբոլիստները, հայկական ֆուտբոլի վետերաններն ու ոլորտի այլ ներկայացուցիչներ ծաղկեդրում են կատարել լեգենդար ֆուտբոլիստ Արկադի Անդրեասյանի արձանի մոտ:
«Արարատ-73»-ի լեգենդար ֆուտբոլիստ Արկադի Անդրեասյանի ամբողջ կյանքի սերը ֆուտբոլն էր։
«Արարատ» ֆուտբոլային ակումբի լեգենդար ֆուտբոլիստը թիմի հաղթանակ կերտող և լավագույն պատրաստվածությամբ խաղացողներից էր։ Խաղընկերների խոսքով՝ Անդրեասյանն աչքի էր ընկնում նաև բացառիկ մարդկային որակներով և մտքի ճկունությամբ։
Նրա մահվան կապակցությամբ ցավակցական ուղերձ են հղել ՀՀ վարչապետ Նիկոլ Փաշինյանը, ՖԻՖԱ-ի նախագահ Ջիանի Ինֆանտինոն, Հայաստանի ֆուտբոլի ֆեդերացիան և այլ պաշտոնատար անձինք ու ֆուտբոլային աշխարհի ներկայացուցիչներ։
Հիշեցնենք, որ դեկտեմբերի 22-ի ուշ երեկոյան 73 տարեկան հասակում հայկական ֆուտբոլի լեգենդար ֆուտբոլիստ, նախկին ԽՍՀՄ չեմպիոն և գավաթակիր, օլիմպիական խաղերի բրոնզե մեդալակիր Արկադի Անդրեասյանը հեռացել է կյանքից։
Լեգենդար ֆուտբոլիստի հոգեհանգստի արարողությունը կկայանա դեկտեմբերի 25-ին՝ ժամը 18.00-ին՝ Կոնդի Սուրբ Հովհաննես եկեղեցում:
Արմինե Գրիգորյան
