«Այս դավադիր ուժն իր լիազորություններն իրականացնում է միայն աթոռը պահելու ուղղությամբ». «Փաստ»
ՄԱՄՈՒԼԻ ՏԵՍՈՒԹՅՈՒՆ
«Փաստ» օրաթերթը գրում է
Խայտառակ կապիտուլ յացիոն փաստաթղթի ստորագրումից շուրջ մեկուկես ամիս անց դեռևս հնչեղ քրեական գործեր առկա չեն, թեպետ արդեն եղել են հնչեղ հայտարարություններ և փաստեր մի շարք հանցագործությունների վերաբերյալ: Այս մասին ընդգծում է իրավաբան, Պառլամենտարիզմի զարգացման միջազգային կենտրոնի գործադիր տնօրեն Գոհար Մելոյանը: Թե ինչու՝ իրավաբանն իր տեսակետն ունի: «Եռակողմ հայտարարությունը նվաստացուցիչ պայմաններ էր նախատեսում հայկական կողմի համար: Ն. Փաշինյանը թույլ տվեց իրեն միանձնյա կերպով, հանրությունից գաղտնի ստորագրել փաստաթուղթ ու փաթաթել այն հայ ազգի վզին՝ խեղաթյուրելով մեր պատմությունը: Թեկուզև միայն սա հիմք է և ակնհայտ փաստեր է պարունակում Ն. Փաշինյանի կողմից սահմանադրական կարգը տապալելու վերաբերյալ»,-«Փաստի» հետ զույցում ասաց նա՝ շեշտելով, որ իր բնույթով այդ հայտարարությունը միջազգային պայմանագիր է, որի վավերացման հստակ մեխանիզմներ կան:
«Ինչ վերաբերում է իրավապահ մարմինների՝ այս դեպքում անգործությանը, ապա մենք արդեն երկուսուկես տարի է՝ ամենատարբեր գործերի շրջանակներում ականատես ենք եղել, թե ինչպիսի անմիջական ազդեցություն ունի Ն. Փաշինյանն իրավապահ մարմինների վրա: Այս պարագայում իրավապահ մարմինները պետք է գիտակցեն, որ իրենց անգործության հետևանքով շարունակում են մի շարք հանցագործություններ տեղի ունենալ, օր օրի շարունակում ենք ունենալ մարդկային և տարածքային կորուստներ, արդեն վտանգված է ՀՀ տարածքային ամբողջականությունը: Իրավապահ մարմինները, կոպիտ ասած, ջայլամի քաղաքականությամբ կոծկում են հանցագործությունները, ուստի պետք է որոշում կայացնեն. կա՛մ օրենքին և Սահմանադրությանը համապատասխան իրականացնում են իրենց պարտականությունները՝ քրեական գործեր հարուցելով ու մեկուսացնելով հանցագործներին, կա՛մ հետագայում իրենք ևս պետք է պատասխանատվության ենթարկվեն իրենց լիազորություններն ու պարտականությունները չիրականացնելու համար»:
Գ. Մելոյանը շեշտեց՝ օր առաջ պետք է ազատվել այս իշխանությունից. «Այս պահին մեր պետությունն անտերության է մատնված: Իսկ այս դավադիր ուժը իր լիազորությունները իրականացնում է միայն մեկ՝ աթոռը պահելու ուղղությամբ: Բացի խայտառակ փաստաթուղթը հայ ժողովրդի վզին փաթաթելուց, շարունակում են հանցավոր անգործության դրսևորել: Ակնհայտ է նաև, որ հայկական կողմի ներկայացուցիչը չի փորձել պահպանել կամ բանակցել հայկական շահի երաշխավորման համար: Ու հիմա ամեն ինչ թողնված է ինքնահոսի: Կա տեղեկություն այն մասին, որ հայկական սահմանային գյուղերում գյուղացիները, ՏԻՄ-երը՝ ի դեմս համայնքապետների և ավագանու անդամների, ինքնակազմակերպվում են ու փորձում ինքնապաշտպանության միջոցներով իրենց բնակավայրը, տունը պաշտպանել:
Եվ սա այն դեպքում, երբ անկախ պետություն ենք, ունենք ՊՆ, այդ նպատակին ծառայող ստորաբաժանումներ, պետական մարմիններ, ի վերջո, գործադիր իշխանության ղեկավար, որի անմիջական պարտականությունն է կազմակերպել այդ տարածքների անվտանգության երաշխավորումը: Բայց՝ ոչ: Ինչ-որ սիրողական մակարդակով՝ GPS համակարգով սահմանազատում է տեղի ունենում, որն անգամ մասնագիտական ծրագիր չէ: Համաշխարհային պրակտիկայում անգամ մի փոքր բլրակ զիջելուց պետություններում պետական հանձնաժողովներ են կազմվում, ուսումնասիրություններն անգամ տարիներ են տևում: Մեզ մոտ ամեն ինչ թողնված է ինքնահոսի. այդ հարցով զբաղվում են միայն հակառակորդ կողմն ու Ռուսաստանի խաղաղապահները: Իսկ ցանկացած բարձրաձայնված իրավիճակի համար իշխող ուժը հղում է կատարում ՌԴ-ին, խաղաղապահներին, կարծես նրանք են ՀՀ ճակատագրի պատասխանատուն: Եվ այդ ամենն արվում է ինչ-որ մեղադրական ինտոնացիաներով: Մեծ հաշվով, անում են այն, ինչ իրենց մոտ միշտ լավ է ստացվել. փորձում են իրենցից հեռացնել ցանկացած պատասխանատվություն և հրաժարվել այդ պատասխանատվությունից: Ինչպես երևում է՝ Ն. Փաշինյանի և իր թիմի երեսպաշտությունը սահման չունի:
Իրենց պատճառով կորսված հայրենիքի և իրենց ապիկար ու դավաճան կառավարման հետևանքով արձանագրված ողբերգալի տվյալներ կան. ունենք 5000-ից ավելի զոհ, հարյուրավոր անհետ կորած ու գերեվարված հայրենակիցներ, տասնյակ հազարավոր վիրավորներ, անտուն մնացած հայրենակիցներ՝ փախստականի կարգավիճակով: Եվ այս պայմաններում անգամ այսքանից հետո դեռ կառչած են աթոռից ու ինչ-որ պիտակավորումներ են անում, պայքար են մղում»: Մեր զրուցակցի խոսքով՝ հիմա բոլորովին այլ իրավիճակ է, ամենևին իշխանության հարց չէ, ու մարդիկ էլ պարզապես վատ կառավարումից չէ, որ դժգոհում են: Նա իրավիճակը համադրեց 1915 թվականի հետ՝ շեշտելով հայերի անտարբերության ու լավատեսության հետևանքի մասին. «Այս պահին նույն սցենարն է: Մենք առերեսված ենք մեր պետականության կորստին ու ընդհանրապես մեր ֆիզիկական գոյությանը: Այս իշխանության րոպե ավելի մնալը ճակատագրական հետևանքներ է ունենում մարդկանց կյանքի վրա:
Մենք հրադադարի ժամանակ մեկ օրում ավելի քան 150 գերեվարված հայրենակից ունեցանք, մարտավարական դիրքեր են հանձնվում թշնամուն: Ամեն անցնող օր մենք հասկանում ենք, որ եթե այս ուժն այս պահին չլիներ, հնարավոր կլիներ կանխել այդ իրավիճակը: Պարզապես պետք է զրո հանդուրժողականություն ցուցաբերել: Անգամ իրավաբան լինելով՝ կարծում եմ, որ, եթե պետք է, անգամ ծայրաստիճան քայլերով, ըմբոստության ակցիաներով րոպե առաջ հեռացնել այս իշխանություններին: Սա այն դեպքում, եթե, իհարկե, իրավապահ մարմինները խորը չմտորեն ստեղծված իրավիճակի մասին և չիրականացնեն իրենց պարտականությունները: Բոլորը՝ անգամ Ն. Փաշինյանի կողմնակիցները, եթե հայրենասեր են, հայ են, պետք է գիտակցեն, որ բոլորս նույն նավի մեջ ենք: Ն. Փաշինյանն այս պահին էլ է փորձում պիտակավորել, բաժանել հանրությանը՝ թշնամացնելով միմյանց հանդեպ: Իրականում չկա «սև-սպիտակ», «էլիտար» ու «ոչ էլիտար»: Այս պահին բոլորս մի նավի մեջ գտնվող հայեր ենք, որը եթե խորտակվի, բոլորս միասին ենք խորտակվելու»:
Մանրամասները՝ «Փաստ» օրաթերթի այսօրվա համարում
