«ԼՂ շուրջ եռակողմ պայմանավորվածությունները հետևողականորեն իրականացվում են». Պուտին

Ռուսաստանի Դաշնության նախագահ Վլադիմիր Պուտինն ասել է, որ Լեռնային Ղարաբաղի հակամարտության շրջանակներում ստորագրված հայտարարությունը, ընդհանուր առմամբ, հետևողականորեն իրականացվում է և, որ ռուս խաղաղապահներն ամեն ինչ անում են իրավիճակը կայունացնելու համար, հայտնում է «ՌԻԱ Նովոստի» գործակալությունը:

«Արդեն նշվել է, որ Ռուսաստանը որոշակի միջնորդական ջանքեր է գործադրել՝ դադարեցնելու համար արյունահեղությունը Լեռնային Ղարաբաղում, հասնելու ամբողջական հրադադարի և սկսելու կայունացման գործընթաց: Միևնույն ժամանակ, մենք փորձեցինք հետևել ԵԱՀԿ Մինսկի խմբում ձեռք բերված հիմնական պայմանավորվածություններին»,- ասել է Պուտինն այսօր տեղի ունեցած ԱՊՀ գագաթնաժողովում:

Պուտինն ավելացրել է. «Կարևոր է, որ, ընդհանուր առմամբ, այն իրականացվում է հետևողականորեն: Շփման գծի երկայնքով տեղակայված ռուս խաղաղապահներն ամեն ինչ անում են իրավիճակի նոր սրումը կանխելու համար»:

Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն, որով Ադրբեջանի վերահսկողությանն են անցնում Արցախի յոթ շրջանները, Շուշին ու Հադրութը` բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։