Մենք ընտրեցինք պատերազմը, բայց չպատրաստվեցինք պատերազմին
ՔԱՂԱՔԱԿԱՆՈՒԹՅՈՒՆ
ՀԱԿ իրավական հարցերի պատասխանատու Արմեն Խաչատրյանը համոզված է, որ Փաշինյանի՝ Արցախը Հայաստան է և վերջ, հայտարարությունը պատերազմի ազդակ է եղել, քանի որ դա խոսում էր այն մասին, որ բանակցություններն այլևս ավարտված են: Սակայն, այդ մասին հատարարելով թե՛ Հայաստանի, թե՛ Արցախի ղեկավարներն այդպես էլ չայտարարեցին, թե մենք որքանո՞վ ենք պատրաստ եղել պատերազմին:
Համեմատություններ կատարելով 90-ականների ու ներկայիս պատերազմների միջև, 1or.am-ի հետ զրույցում նա ընդգծեց, որ երկու դեպքում էլ Ադրբեջանը ավելի շատ զենք է ունեցել, բայց Հայաստանը նախկինում ավելի շատ ռեսուրս է ունեցել ադրբեջանցիների դեմ պայքարելու համար:
«Ես կարծում եմ, որ առաջիկայում կթեժանան բոլոր հարցերի շուրջ քննարկումները և ամեն ինչ ավելի հստակ կդառնա, թե ինչու հասանք այս իրավիճակին: Եթե հակառակորդ կողմը բանակցությունների ընթացքում հասկանար, որ խոսքը գնում է գրավյալ տարածքների վերադարձի մասին, ապա կարող էին այլ կերպ զարգանալ իրադարձությունները: Մինչդեռ հակառակորդը հասկացավ, որ ավարտվել է բանակցությունների ձևաչափը և գնաց պատերազմի ճանապարհով: Մենք պետք է ուսումնասիրություն կատարենք 91 թվականից մինչ օրս տեղի ունեցած գործողությունները և հասկանանք, թե ինչու հասանք այս օրվան: Բայց, ակնհայտ է, որ մենք ընտրեցինք պատերազմը, բայց պատշաճ չպատրաստվեցինք պատերազմին: Ավելին թալանվեց բանակը, որի արդյունքում եղավ այն՝ ինչ եղավ»,- ասաց Ա. Խաչատրյանը:
Արմինե Գրիգորյան
