Պարտված երկրի ղեկավարը միայն մեկ ճանապարհ ունի. Հասմիկ Պապյան
ՄՇԱԿՈՒՅԹ
Օպերային երգչուհի, ՀՀ ժողովրդական արտիստ Հասմիկ Պապյանը շատ շուտ է հասկացել, որ Հայաստանում տեղի ունեցած իշխանափոխությունը այն չէր, ինչի մասին երազում էր ողջ հայ ժողովուրդը: Հետագայում արդեն սկսվել է հիասթափությունների շղթան, որը մինչ օրս, այդպես էլ չի ավարտվում:
1or.am-ի հետ զրույցում նա նշեց, որ այն դրական էներգիան որը կար 2018 թվականին շատ շուտ մսխվեց և հայ ժողովուրդը կրկին հայտնվեց կոտրած տաշտակի առջև:
«Մենք մշտապես խուսափել ենք իրերն իրենց անուններով կոչելուց և այդ պատճառով էլ մշտապես հայտնվել ենք փլատակների տակ: Երկար տարիներ կեղծ իրականության պայմաններում ապրելով, հիմա դժվար է հույսի կոտրատված մասնիկները հավաքել: Ու թեև ես լավատես եմ, բայց ինձ դեռ ժամանակ է պետք, որպեսզի կատարվածի հետ կարողանամ համակերպվել»,- ասաց Հ. Պապյանը:
Երգչուհու կարծիքով հայրենիքը ուժեղ մարդկանց կարիքն ունի այն ժամանակ, երբ տկար է, բայց դրա համար նախ հարկավոր է ունենալ վստահելի կառավարություն: Ու թեև նա դեռ չի պատկերացնում, թե ով կարող է այս վիճակում ստանձնել երկրի կառավարման ղեկը, բայց հույս ունի, որ դա ևս անխուսափելի է:
«Այս կառավարությունը նախորդի նման չգիտի ինչ է ուզում և ուր է գնում, որը ոչ մի տեղ տանող ճանապարհ է: Ու թեև ես պաշտպանել եմ հեղափոխությունը, բայց շատ շուտ հասկացել եմ, որ մենք խորը մոլորության մեջ ենք: Մինչ օրս, նույնիսկ կամք չդրսևորվեց Ամուլսարի հարցը լուծելու համար, իսկ պատերազմը, որը սանձազերծվեց պարզապես աղետ էր երկրի համար: Պարտված ղեկավարը մեկ ճանապարհ ունի՝ հրաժարական տալու, իսկ մնացած խոսքերը ավելորդ են»,- ասաց Հ. Պապյանը:
Արմինե Գրիգորյան
