Ոստիկանությունն արգելում է Փաշինյանի հրաժարականի պահանջով անհնազանդության խաղաղ ակցիաների անցկացումը
ՀԱՍԱՐԱԿՈՒԹՅՈՒՆ
Երևանում այսօր անհնազանդության զանգվածային հերթական ակցիան էր: Քաղաքացիները մայրաքաղաքի տարբեր հատվածներում փակել էին ճանապարհներ, գլխավոր պողոտաների խաչմերուկներ:
Զանգվածային ակցիային զուգահեռ ոստիկանության զորքերը, հատուկջոկատայինները սկսեցին բերման ենթարկել քաղաքացիներին` թույլ չտալով նրանց արտահայտել իրենց բողոքի ձայնը: Ընդհուպ, բերման ենթարկվեց նաև իրավապաշտպան Ռուբեն Մելիքյանը, ով այնտեղ էր գտնվում քաղաքացիների իրավունքների պաշտպանության համար:
Իրավապաշտպան Ավետիք Իշխանյանը լրագրողների հետ զրույցում ասաց, որ ՀՀ ողջ պատմության ընթացքում սա առաջին դեպքն է, երբ երիտասարդները, ժողովուրդը դուրս է գալիս իր արժանապատվությունը պահելու, բայց իրավապահ մարմիները ոտնատակ են տալիս այդ արժանապատվությունը։ «Հավաքված այս բոլոր ոստիկանական ուժերը ոչ թե իրավապահ մարմիններ են և պետությունը պահպանողներ, այլ նրանք պարտության ոստիկաններ են»,– հավելեց նա։
Փաշինյանի՝ որպես պարտվող ղեկավարի հրաժարականը պահանջող ակցիաներ են տեղի ունեցել Շենգավիթում, Հանրապետություն-Տիգրան Մեծ պողոտայի խաչմերուկում, Գայի պողոտայում, Կիևյան կամրջի հատվածում, Սարյան փողոցում, ինչպես նաև Երևան քաղաքի տարբեր հատվածներում:
Գյումրիում ևս շրջափակվել էր մարզպետարանի շենքը:
ՄԻՊ արագ արձագանքման խմբերը մեկնել են Ոստիկանության Երևանի և Գյումրիի բաժիններ՝ ակցիաներ իրականացնող անձանց իրավունքների պաշտպանության նպատակով:
