Հետպատերազմյան Ստեփանակերտի շուկան դատարկ է. տեսանյութ
ՀԱՍԱՐԱԿՈՒԹՅՈՒՆՍերժիկն այսօր առաջին անգամ վերադարձել է աշխատավայր՝ Ստեփանակերտի կիսադատարկ շուկա, որտեղ նրանից բացի միայն մսագործն ու երկու զինվորականներ են։
Sputnik Արմենիայի նկարահանող խումբը եղել է Ստեփանակերտի շուկայում, որտեղ զրուցել է Մարտունու շրջանի Զարդարաշեն գյուղի բնակիչ Սերժիկի հետ, որը որդու՝ Վոլոդյայի (Զարդարաշենի համայնքի ղեկավար) և 13 զինվորների հետ միասին դիրքերում է եղել, երբ իրենց վրա հարձակվել է ադրբեջանական բանակի մոտ 300 զինվոր։
Տղամարդը պատմում է, որ ստիպված են եղել նահանջել, մինչև Ստեփանակերտից օգնության են հասել տղերքը։
«Իմ տղան եկել է տուն, որ տղերքին դիրքեր ուտելիք տանի։ Հետդարձի ճանապարհին տղաս 5 ադրբեջանցիների է հանդիպել ու բոլորին ոչնչացրել։ Բայց գյուղը շատ դժվար էր պահել, միայն այդ օրը մոտ 500-600 ադրբեջանցիներ էին լցվել գյուղ»,–պատմում է տղամարդը։
Նրա խոսքով` որդին 4 օր շրջափակման մեջ է մնացել, ոչինչ չի կերել, չի խմել։
Չնայած ստեղծված իրավիճակին, Սերժիկն այսօր առաջին անգամ վերադարձել է իր աշխատավայր՝ Ստեփանակերտի կիսադատարկ շուկա, որտեղ նրանից բացի միայն մսագործն ու երկու զինվորականներ են, որոնք Քարինտակ գյուղից բերված լոբի էին մաքրում։ Ասում են՝ ողջ Արցախում այն ամենահամեղն է։ Քարինտակը, ինչպես նաև Զարդարաշենը, մենք կորցրել ենք։
