Ընդդիմությունը հրապարակեց հետագա քայլերի ճանապարհային քարտեզը

 Առաջին քայլը, որ պետք է արվի հայրենիքի փրկության համար, Նիկոլ Փաշինյանի հեռացումն է։ Այս մասին Ազատության հրապարակում Նիկոլ Փաշինյանի հրաժարականի պահանջով հանրահավաքի ընթացքում հայտարարեց ՀՅԴ ԳՄ ներկայացուցիչ Իշխան Սաղաթելյանը և ներկայացրեց իրենց գործողությունների ճանապարհային քարտեզը:

Սաղաթելյանը ներկայացրեց, որ Փաշինյանի հրաժարականին հասնելու համար կա երկու ճանապարհ, առաջինը` Փաշինյանն ինքնակամ հասկանա, մեղանչի և հրաժարական տա, որից սակայն վարչապետը հրաժարվել է։ Երկրորդ իրավական ճանապարհն այն է, որ Աժ–ն անհապաղ պետք է հրավիրի արտահերթ նիստ երկու օրակարգով` ռազմական դրության վերացում և Նիկոլ Փաշինյանի պաշտոնանկություն։
«Մեզ հաճախ հարցնում են թե ինչ է լինելու Փաշինյանի հեռացումից հետո։ Վարչապետի հեռացումից հետո ԱԺ–ն պետք է ընտրի նոր վարչապետ, ժողովրդի կողմից վստահելի մարդկանցով ձևավորի Ազգային համաձայնության ժամանակավոր կառավարություն, որը լուծելու է երեք խնդիր։
-Հնարավորինս փոփոխության ենթարկել զինադադարի հայտարարությամբ նախատեսված համաձայնությունները և նվազագույնի հասցնել մեր կորուստները, 
-Արտահերթ քայլեր ձեռնարկել պատերազմի հետևանքով առաջացած հումանիտար, անվտանգության , սոցիալ–տնտեսական, առողջապահական, տնտեսական բոլոր հիմնախնդիրները լուծելու ուղղությամբ,
–Սեղմ ժամկետներում կազմակերպի ազատ, արդար, հավասար պայմաններով խորհրդարանական ընտրություններ, որի արդյունքում ժողովուրդը կորոշի իր իշխանությանը և կձևավորի նոր կառավարություն։