4 ամիս առաջ վիրավորված զինվորն արդեն տանն է. հիշողությունն ու տեսողությունը չի վերականգնվել, սուր գլխացավեր ունի

Արցախում հունիսին ծանր վիրավորում ստացած Ալբերտ Դալլաքյանը շուրջ մեկ ամիս առաջ Կարմիր խաչի վերականգնողական կենտրոնից դուրս է գրվել, թեեւ սուր գլխացավեր ունի, տեսողությունն ու հիշողությունն էլ չեն վերականգնվել:

«Բժիշկներն ասում են, որ հիշողությունը ժամանակի խնդիր է, իսկ տեսողության համար ոչինչ չեն ասում: Հետազոտվել է Ալբերտը ու պարզվում է՝ նյարդն է վնասվել: Թե ինչ պետք է լինի, մենք էլ չգիտենք, բժիշկներն էլ հստակ ոչինչ չեն ասում: Հիմա էլ սուր գլխացավեր ունի, պիտի նորից հետազոտման գնանք»,- NEWS.am-ի թղթակցի հետ զրույցում ասաց Ալբերտի մայրը` տիկին Արմինեն:

Տիկին Արմինեն հայտնեց նաեւ, որ Ալբերտը սկսել է խոսել, արդեն իր անունն ու ազգանունը կարողանում է արտաբերել: Մոր խոսքով, որդու հետ լոգոպեդ է աշխատում, որի շնորհիվ էլ նա սկսել է բառեր արտաբերել:

Նշենք, որ Ալբերտ Դալլաքյանը գլխի վիրավորումը ստացել է հունիսի 24-ին Արցախում: Ի սկզբանե ծնողները չեն իմացել, թե ինչ պայմաններում է նա վիրավորում ստացել, ավելի ուշ են պարզել միայն՝ ավագ լեյտենանտ Ավագ Նահապետյանն է կրակել: Սկզբում Դալլաքյաններն իմացել են, թե անզգույշ կրակոց է եղել, վերջերս էլ զորամասից տեղեկացել են, թե ավագ լեյտենանտը «խաղացել է» ուրիշի զենքով եւ այդ ժամանակ կրակել: Ավագ Նահապետյանին մեղադրանք է առաջադրվել, նախաքննությունը շարունակվում է:

Հիշեցնենք, որ Ալբերտ Դալլաքյանը բռնցքամարտիկ է, ՌԴ-ից մեկ տարի առաջ եկել էր՝ հատուկ Արցախում ծառայելու համար: Նրա վիրավորվելուց հետո ընտանիքը վերադարձել է Երեւան եւ հիմա վարձով է ապրում: Ի դեպ, Դալլաքյաններն օգնության համար դիմել էին պաշտպանության արդեն նախկին նախարար Սեյրան Օհանյանին, սակայն մերժում էին ստացել: