Անգամ փոքր ջանք գործադրելու դեպքում հնարավոր կլինի ադրբեջանական ուժերին սարերից դուրս շպրտել. ռազմական վերլուծաբան
ՔԱՂԱՔԱԿԱՆՈՒԹՅՈՒՆ
Արդեն մեկ ամիս է ողջ աշխարհի ուշադրությունը սևեռված է Ացախի վրա: Ու թեև միջազգային կառույցները շարունակում են կրավորական կեցվածք ընդունել և ադրբեջանա-թուրքական ահաբեկչական պատերազմը սանձելու հստակ քայլեր չձեռնարկել, բայց, ինչպես ասում են, կյանքը շարունակվում է` իր հետ բերելով նորանոր փորձություններ: Ռազմական վերլուծաբան, քաղաքագետ Եվգենի Կրուտիկովը, վերլուծելով պատերազմի ընթացքը, հանգել է այն եզրակացության, որ Ադրբեջանը չնայած Արցախի խաղաղ բնակչության ու զինվորների դեմ օգտագործեց իր զինանոցում եղած ողջ տեխնիկան, բայց տեսնելով, որ չի կարողանում հաջողության հասնել, որոշեց փոխել իր ռազմավարությունը:
Բանակցություններին մասնակցելու պատրվակն օգտագործելով՝ ադրբեջանական կողմը, փաստորեն, փորձել է վերակազմավորել ուժերը և վերանայել հարձակման մարտավարությունը: Ռուսական Взгляд պարբերականում հրապարակված հոդվածում, փորձագետը անդրադառնալով արցախա-ադրբեջանական պատերազմի ընթացքում վերջին օրերին տեղի ունեցած իրադարձություններին, ընդգծել է, որ ադրբեջանական կողմի գրոհները Լաչինի ուղղությամբ չեզոքացվել են հայկական բանակի կողմից: Ավելին, հաջողվել է անգամ ազատագրել Կուբաթլուն և ևս հինգ գյուղ: Դրան ի պատասխան ադրբեջանական կողմը փորձ կատարեց հարձակում նախապատրաստել Շուշիի ուղղությամբ, քանի որ խնդիր է դրված եղել մինչև հոկտեմբերի 31-ը, ի պատիվ Իլհամ Ալիևի նախագահ ընտրվելու օրվան, հասնել որոշակի հաջողությունների, որը դժվար իրագործելի հարց է:
Ըստ վերլուծաբանի, նախանշված ուղղությամբ առաջ շարժվելն այնքան էլ հեշտ չէ: Եվգենի Կրուտիկովը վերլուծելով տեղանքը հանգում է այն եզրակացության, որ, թեև 1992-ին Արկադի Տեր-Թադևոսյանին հաջողվեց գրավել Շուշիի անառիկ բերդը, բայց այսօր այն նույն ճանապարհով գրավել հնարավոր չէ: Փորձագետի դիտարկմամբ՝ սկզբունքորեն, ներկա պահը ռազմաճակատում ստեղծվել է մի իրավիճակ, որ հայկական բանակի կողմից անգամ փոքր ջանք գործադրելու դեպքում հնարավոր կլինի ռազմական իրավիճակը Արցախի ազատարգրման օգտին շուռ տալ և ադրբեջանական ուժերին սարերից դուրս շպրտել:
«Բայց, պատերազմում ամեն ինչ որոշվում է տեղում: Ավելի ճիշտ՝ այն լեռներում, որտեղ հայերն ունեն պատմական և զուտ աշխարհագրական առավելություն»,- եզրափակում է վելուծաբանը:
Պատրաստեց՝ Արմինե Գրիգորյանը
