Լեռնային Ղարաբաղում մարտերը շարունակվում են մոլեգնել․ Associated Press-ի անդրադարձը (լուսանկարներ)
ՖՈՏՈ
Լեռնային Ղարաբաղում Հայաստանի և Ադրբեջանի միջև մոլեգնող պատերազմի և չդադարող գնդակոծությունների պայմաններում շատ բնակիչներ հրթիռներից ու հրետանային արկերից պատշպանվելու համար ապաստանել են նկուղներում, գրում է Associated Press թերթը։
Մի քանի ընտանիքներ, այդ թվում՝ երեխաներ և տարեց կանայք, ապաստան են գտել Ստեփանակերտի դպրոցի նկուղում, գրում է աղբյուրը՝ նշելով, որ «փոքր երեխաները խաղում և ծիծաղում էին, մինչև կանայք կերակուր էին պատրաստում և փորձում տաքացնել սառը դպրոցական նկուղը»։
Տեղի բնակիչներից մեկը թերթի թղթակցին հայտնել է, որ իր հինգ որդիներն առաջնագծում են՝ ընդգծելով, որ «նրանք պայքարում են Արցախում ապրելու իրենց իրավունքի համար»։
Թերթը նաև ընդգծում է, որ Թուրքիան բացահայտ աջակցում է Ադրբեջանին, իր երկրում պատրաստում է ադրբեջանցի զինվորականներին և նրանց անօդաչու թռչող սարքեր և հեռահար հրթիռային համալիրներ տրամադրում։
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 24-ի դրությամբ Արցախի զինուժը խոցել է հակառակորդի՝ 16 ուղղաթիռ, 24 ինքնաթիռ, 217 անօդաչու թռչող սարք, 600 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 6 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 6614 զոհ։ Հայկական կողմից, նախնական տվյալներով, կա 963 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 40 քաղաքացիական անձ, վիրավորվել է 120 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։
Հայաստանում և Արցախում սեպտեմբերի 27-ին հայտարարվել է ռազմական դրություն։
Արդեն երկու անգամ հայտարարվել է մարդասիրական հրադադարի մասին, սակայն ադրբեջանական զինուժը դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում:
