Հայկը շատ հայրենասեր էր, ասում էր՝ աշխարհին ստիպելու եմ ճանաչել Արցախի անկախությունը. նահատակված զինծառայողի կուրսեցի

Սեպտեմբերի 27-ին թուրք-ադրբեջանական հարձակումների պատճառով ընթացող մարտերում զոհված Հայկ Ղուլյանը ծառայում էր Հադրութում:

Հայկը ծնվել է 2001 թվականին Արցախի Մարտունու Շեխեր գյուղում: Սովորում էր ԵՊՀ-ի միջազգային հարաբերությունների ֆակուլտետում, սակայն առաջին կուրսի երկրորդ կիսամյակից մեկնել է բանակ, հետագայում ուսումը շարունակելու հստակ որոշմամբ:

Հայկ Ղուլյանի կուրսեցի Արմինե Գալստյանը, Tet.am-ի հետ զրույցում հիշելով դասընկերոջը, պատմում է, որ Հայկը բոլորին օգնում էր, շատ եռանդուն ու նպատակասլաց էր, իսկ հիմնական նպատակը Արցախի նախագահ դառնալն էր.

«Հայկը շատ հայրենասեր էր, միշտ մեր կուրսեցիներին ասում էր, որ երբ դառնամ Արցախի նախագահ, դուք լինելու եք իմ օգնականները և անընդհատ խոսում էր Արցախյան հարցի կարգավորման մասին և ասում՝ Արցախյան հարցը կարգավորելու եմ միայն բանակցությունների միջոցով, ամբողջ աշխարհին ստիպելու եմ ճանաչել Արցախի անկախությունը»:

Արմինե Գալստյանն ասում  է ծառայության ընթացքում խոսել են Հայկի հետ, զրույցի ժամանակ նշել է, որ բանակից վերադառնալուց հետո կրթությունը պետք է շարունակի և ուսումնասիրի միջազգային իրավունք առարկան:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 6-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 126 անօդաչու թռչող սարք, 379 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 3454 զոհ, ավելի քան 5270 վիրավոր։ Հայկական կողմից, նախնական տվյալներով, կա 251 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում վիրավորվել է 80 քաղաքացիական անձ, զոհվել՝ 19 մարդ, վնասվել՝ մոտ 2700 գույք ու ենթակառուցվածք։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։