Փաշինյանի դիրքորոշման ակնթարթային փոփոխությունը՝ որպես հարկադրված քայլ
ՔԱՂԱՔԱԿԱՆՈՒԹՅՈՒՆ
Բարակ Օբամայի նախագահության վերջին տարիներին Հայաստանում ԱՄՆ-ի աննախադեպ ակտիվությունը հանգեցրել է 2018 թվականի հեղափոխությանը, ինչի արդյունքում իշխանության է եկել լրագրող Նիկոլ Փաշինյանը: «The Moscow Post»-ում հրապարակված «Сеть агентов Сороса в Армении» հոդվածի հեղինակը Վալենտինա Իվցովան է:
Հայաստանն Անդրկովկասում Ռուսաստանի ռազմավարական դաշնակիցն է, որի հետ մեզ կապում են բազմադարյա եղբայրական հարաբերություններ: Բայց այս ողջ փառահեղ անցյալը և դաշնակցային հարաբերությունները խոչընդոտ չեն դարձել ստանդարտ «թավշյա հեղափոխության փաթեթի» իրագործմանը, որը նախկինում իրագործվել է Վրաստանում, Ուկրաինայում և մի շարք այլ երկրներում:
Իվցովան հիշեցնում է, որ հայկական ԶԼՄ-ները նշել են՝ հանրապետությունում ամերիկացիների կողմից գործակալների ցանցի ընդլայնման համար նրանց օգնում են մի շարք տեղական հասարակական կազմակերպություններ, որոնցից գլխավորը «Բաց հասարակություն հիմնադրամներ-Հայաստան»-ն է, պարզ ասած՝ Սորոսի հիմնադրամը: Վերջերս «Russia Today»-ի ղեկավար Մարգարիտա Սիմոնյանի և Հայաստանի վարչապետ Նիկոլ Փաշինյանի միջև սկանդալ էր սկսվել, որի գլխավոր թեման դարձել էր Հայաստանում տխրահռչակ Սորոսի գործունեությունը:
Սիմոնյանը նշել էր.
- Դուք երկիրը հեղեղել եք հակառուսական հասարակական կազմակերպություններով, որոնք ձեր տարածքում երիտասարդությանը սովորեցնում են՝ ինչպես տապալել իշխանությունը Ռուսաստանում: Դուք Կովկասում դարձել եք հակառուսական ուժերի ցատկահարթակ:
«РБК»-ի հետ հարցազրույցում Փաշինյանը նշել էր, որ տվյալ կազմակերպությունները ստեղծված են եղել դեռևս Ռոբերտ Քոչարյանի կառավարության ժամանակ, ում Ռուսաստանը վստահում էր: Այս առիթով նա ասել էր.
- Ռուսաստանի դեմ թշնամական համարվող ՀԿ-ները Հայաստանում գործում են նախագահների կառավարության ժամանակից ի վեր, ում հավատարմությանը Ռուսաստանում ոչ ոք չէր կասկածում:
Ռոբերտ Քոչարյանի պատասխանը երկար սպասեցնել չի տվել.
- Հարցը հենց Սորոսում չէ, այն հասարակ հասկացություն է դարձել: Բայց ես տեսնում եմ՝ ինչ է կատարվում այստեղ. երիտասարդ սերնդին արժեքների պարտադրում, որոնցից արմատախիլ է արվում այն բաղադրիչը, որը հանդիսանում է մեր ինքնության առանձնահատկությունը՝ ընտանիքը, հավատը: Դաշնակիցների հավերժության կամ ոչ հավերժ լինելու, որոշ երկրներին դիվականացնելու մասին խոսակցություններ կան: Եթե նախկինում դա արվում էր մարգինալ, հասարակական կազմակերպությունների մակարդակում, այժմ այս ողջ կազմը լցվել է իշխանության մեջ: Ես, անգամ, չգիտեի, որ Հայաստանում Սորոսի գրասենյակ կա: Նրանք՝ ոչ մի գործընթացի վրա չազդող մարգինալ կազմակերպություն էին, իսկ այժմ նրանք շատ են ակտիվացել: Ես զարմացա, որ նրանք վերջին տարիներին այդքան ուժեղացել են:
Եթե իր վարչապետության սկզբնական շրջանում Փաշինյանն անվտանգության ոլորտում բարձր պաշտոնների է նշանակել նախկին իշխանության ներկայացուցիչներին, իսկ իր թիմին ավելի շատ սոցիալ-տնտեսական բլոկ է տարել, ապա 2018 թվականի դեկտեմբերի խորհրդարանական ընտրություններից և իր դիրքերի ամրացումից հետո «իր հետ քայլող» սորոսականների նշանակումը ձեռք է բերել լայնամասշտաբ բնույթ: Հասարակական կազմակերպությունների ներկայացուցիչների, ակտիվիստների և լրատվամիջոցների աշխատակիցների հենց այս խմբերն են հանդիսացել Երևանում Ռուսաստանի դեսպանատան առջև հակառուսական ակցիաների կազմակերպիչները: Հենց նրանք են ԱՄՆ-ում և Եվրոպայում ստացել «թավշյա» հեղափոխականների հմտությունները, որոնք կիրառվել են 2018 թվականի հեղափոխության շրջանում:
Լրագրողը հիշեցնում է, որ այդ բոլոր խմբերը, ինչպես նաև ինքը՝ Փաշինյանը, հանդես էին գալիս Եվրասիական տնտեսական միությունից և Հավաքական անվտանգության մասին պայմանագրի կազմակերպությունից Հայաստանի դուրս գալու օգտին: Իշխանության գալուց հետո ինտեգրացիոն միությունների նկատմամբ Փաշինյանի դիրքորոշման ակնթարթային փոփոխությունը դիտվում է որպես հարկադրված քայլ մի երկրի, որը շրջապատված է անբարյացկամներով և որի միակ հովանավորը Ռուսաստանն է:
Նյութը հրապարակման պատրաստեց Լիլիթ Ամիրաղյանը
