Ռուսաստանի դեմ տնտեսական պատժամիջոցների խստացման հնարավորությունը՝ կապված Պուտինի տնտեսական քաղաքականության թերությունների հետ
ՏՆՏԵՍՈՒԹՅՈՒՆ
Քաղաքական գործիչները քննարկում են Ռուսաստանի դեմ տնտեսական պատժամիջոցների խստացման հնարավորությունը և Կրեմլի նկատմամբ Արևմուտքի դիրքորոշումը: Սակայն նրանք պետք է հաշվի առնեն այն հանգամանքը, որ Ռուսաստանը հարուստ բյուջե ունի, հետևաբար հեշտ չի լինի «ծնկի բերել» երկիրը: Այս մասին գերմանական «Die Welt» ամսագրի իր հոդվածում նշել է լրագրող Հոլգեր Ցշեպիտցը (Holger Zschäpitz):
Ռուսաստանի արժութային ռեզերվների ծավալը վերջերս նոր ռեկորդ է սահմանել՝ հասնելով 600 մլրդ դոլարի:
«Աշխարհում ֆինանսական ռեզերվների մեծությամբ Ռուսաստանը 5-րդն է և պետական պարտքի չափով վերջից 6-րդը: Աշխարհաքաղաքական պլանում ոչ այնքան խոցելի լինելով՝ կառավարությունը հարմարավետ դիրքում է գտնվում»,- ասել է «Macro-Advisory» անկախ խորհրդատվական ընկերության ռազմավար Քրիս Վիֆերը:
Ռուսաստանի կայունությունը հանդիսանում է Պուտինի տնտեսական քաղաքականության արդյունք: Անցած երկու տասնամյակների ընթացքում նա ցույց է տվել, որ տնտեսական ոլորտում շատ կարևոր սկզբունքներ և համոզմունքներ ունի: Այդ սկզբունքներից մեկը չափազանց մեծ պարտքերից հրաժարվելը և ֆինանսական ռեզերվների աճեցման ձգտումն է:
Երբ 2014 թվականին տեղի է ունեցել նավթի գնանկում, Պուտինի կարգադրությամբ ռուբլին արժեզրկել են, ինչի շնորհիվ նավթի արտահանման ազգային արժույթով եկամուտներն այդ աստիճան արագընթաց կերպով չեն կրճատվել: Նա ներմուծել է «բյուջետային կանոն», որը կանխում է պետական պարտքի «վերսլացումը»:
Միաժամանակ Պուտինը որոշել է վերակազմավորել ռուսական արժութային ռեզերվները՝ նախընտրելով հրաժարվել դոլարից և ավելացնելով ոսկու պաշարները: Եթե 2008 թվականին ռուսական ռեզերվների կառույցում ոսկու բաժինը կազմել է 2,2%, ապա ներկա պահին այն կազմում է Ռուսաստանի ռեզերվների մոտ քառորդ մասը:
Ոսկու գնաճի շնորհիվ ազգային ռեզերվները թանկացել են՝ օգոստոսին հասնելով պատմական ռեկորդի՝ 600 մլրդ դոլարի:
Սակայն պետք է նշել, որ ոսկու դրույքը ռիսկային է, քանի որ արտակարգ իրավիճակներում թանկարժեք մետաղը չի կարող իրացվել: Պուտինի տնտեսական քաղաքականության մյուս թերությունն այն է, որ ֆինանսական կայունությունը մասամբ ապահովվել է բնակչության հաշվին: Տնտեսական աճը չի ուղեկցվել հասարակության բարեկեցության բարձրացումով: Այսպիսով, Արևմուտքը Ռուսաստանի հետ ապագա բանակցությունների ընթացքում կարող է հիմնվել բնակչության դժգոհությունների վրա:
Նյութը հրապարակման պատրաստեց Լիլիթ Ամիրաղյանը:
