Ինչ հագնել այս աշնանը՝ նորաձեւ լինելու համար
ՖՈՏՈ
Զգեստապահարանն առաջիկա ամիսներին կարելի է համալրել թարմ ու հետաքրքիր իրերով: Չեզոք գույների համադրություններից մինչեւ պայծառ երանգների բազմազանություն. բոլորն էլ իրենց ճաշակին համապատասխան ինչ-որ բան կգտնեն: BRAVO.am-ն առանձնացրել է 2020-ի աշնան թրենդները. պատրաստ եղեք դրանցից մի քանիսը տեսնել ամենուր, որտեղ կլինեք:):
Վառ կոստյումներ
Գրասենյակում աշխատելուց մինչեւ ձեր ընկերների հետ սրճելու գնալիս կրեք վառ կոստյումներ: Դրանք ավելի պայծառ կդարձնեն ձեր յուրաքանչյուր օրը: Ավանդական գույների փոխարեն փորձեք ավելի տաք երանգներ, օրինակ՝ կապույտ կամ կարմիր: Գտեք այն գույները, որոնք համապատասխանում են ձեր մաշկին: Այս կերպարին կարող եք ավելացնել նաեւ հետաքրքիր աքսեսուարներ՝ կլատչ եւ թրենդային կրունկներ: Նման համադրություններն այլընտրանքային տարբերակ կլինեն եւ թույլ կտան տարբերվել:
Արհեստական կաշվից շագանակագույն բաճկոններ
Արհեստական կաշվից վերնազգեստները խոր աշնանային ամիսների համար դասական եւ հրաշալի տարբերակ են եւ այս տարի շարունակում են լինել գերժամանակակից: Դրանք կարող եք կրել տաբատով կամ կարճ փեշով, նույնիսկ կարող եք կապել իրանը եւ ստեղծել հագուստ: Այս բաճկոնների հետ կատարյալ համադրվում են սեւը, մոխրագույնը կամ կապույտը:
Ամբողջությամբ բնական երանգներ
Այս համադրությունն անցած մի քանի տարիների ամենատարածված միտումներից է եւ նորաձեւությունում կլինի դեռ երկար ժամանակ: Մոնոխրոմային եւ չեզոք գույնի հանդերձանքները բավական հեշտ համադրելի են: Կարելի է ընտրել ավազագույն կոստյում՝ նույն որակի տաբատով կամ անգամ կաշվե փեշով: Պետք չէ վախենալ փորձարկել չեզոք գույների տարբեր երանգները:
Լայն տաբատը կոշիկների մեջ խցկած
Տարբեր ոճեր միախառնելը հիանալի միջոց է նոր միտում հայտնաբերելու համար: Աշնանային կիսաճտքավոր կոշիկների մեջ տաբատը տեղավորելը լուծում է դասական հանդերձանքն ավելի հետաքրքիր դարձնելու համար: Անկախ նրանից, թե ինչ կերպար եք ընտրել, սա կօգնի ընդգծել ձեր անհատականությունը:
Կապույտը՝ բնական երանգների հետ
Կապույտի եւ չեզոք գույների համադրությունն ասես հատուկ աշնան համար լինի: Այն համատեղում է վերջին մի քանի ամիսների ամենանորաձեւ երանգները: Կարող եք ընտրել փայլուն շագանակագույն կոստյում եւ կապույտ պայուսակ, կամ էլ ամբողջովին կապույտ կերպարին ավելացնել չեզոք գույնի կաշվե կոշիկներ:
Վագրային պրինտ
Սեւի եւ տաք շագանակագույնի համադրությունը կատարյալ է աշնանային ջերմաստիճանի համար: Այս խառնուրդի մեջ կապույտ ջինս ավելացրեք եւ մի վախեցեք խաղալ թրենդային պարագաների կամ կոշիկների հետ: Զվարճացեք, այս միտումը ձեր տեսքը թարմացնելու հեշտ միջոց է:
Վառ, փափուկ ձեռքի պայուսակներ
Բազմաթիվ դիզայներներ այս աշնան համար առաջարկում են փափուկ պայուսակներ: Ընտրեք վառ ու տաք երանգներ. փորձեք նարնջագույնը շագանակագույնի կամ սեւի փոխարեն, դեղինը՝ մուգ կապույտի կամ մուգ կանաչի փոխարեն: Այս աքսեսուարը հարմարավետ եւ նորաձեւ ընտրություն է:
Շղթաներ եւ շրջանաձեւ ականջօղեր
Այս աշնանը շղթաները կարող եք համադրել նույնատոն օղերի հետ: Ընտրեք ոսկի կամ արծաթ. մի փոքր գույն ավելացրեք ձեր հանդերձանքին: Դուք կցանկանաք ամեն օր կրել դրանք՝ անկախ նրանից, թե ուր եք գնում:
