Սիլիկոնյան հովտի էլիտան ուզում է ապրել լողացող քաղաքներում
ՀԱՍԱՐԱԿՈՒԹՅՈՒՆ
Հարուստները ցանկանում են ապրել լողացող քաղաքներում: Սա պաշտոնյաներից ու աղետներից խուսափելու հնարավորություն է:
Հետազոտական կենտրոն Seasteading Institute-ը 2008 թվականից սկսած՝ զբաղված է օվկիանոսում անկախ արհեստական կղզի ստեղծելու նախագծով: Նրա հիմնադիր Պետրի Ֆրիդմանը՝ Google-ի նախկին ինժեները, նշել է, որ համաճարակի «շնորհիվ» իր կազմակերպության հանդեպ մարդկանց հետաքրքրությունն զգալիորեն աճել է:
Մոտ 10 տարի առաջ կալիֆոռնիացի միլիարդատեր և ներդրող Պիտեր Տիլը 1,7 մլն դոլար է ներդնել օվկիանոսում լողացող և ինքնավար քաղաքականություն ունեցող քաղաք-կղզիների ստեղծման նախագծում: 2017 թվականին նա հրաժարվել է իր ուտոպիական գաղափարից, բայց սիստեյդինգի՝ բաց օվկիանոսում լողացող ազատ համայնքներում ապրելու գաղափարը շարունակել է տարածվել Սիլիկոնյան հովտի ազատամիտ միլիարդատերերի շրջանում: 2020 թվականի կորոնավիրուսային համավարակի պայմաններում՝ նրանցից շատերը լողացող կղզու կառուցմանը չսպասելով, թաքնվել են Նոր Զելանդիայում գտնվող իրենց շքեղ բունկերներում:
2019 թվականին ՄԱԿ-ը քննարկել է Oceanix City լողացող համայնք կառուցելու նախագիծը: Նախագծի համաձայն՝ համայնքը կարող է դիմակայել ջրհեղեղներին, ցունամիներին և 5-րդ կարգի փոթորիկներին: Oceanix City-ն՝ ի տարբերություն Seasteading Institute-ի, ուղղված է ոչ թե ուտոպիական, հարկերից զերծ ու ազատ ապաստարան-քաղաքների կառուցմանը, այլ՝ աշխարհի մեծագույն խնդիրների պրակտիկ լուծմանը:
Նյութը հրապարակման պատրաստեց Լիլիթ Ամիրաղյանը:
