Կոնդեցի Հարութը դանակահարվել է ընկերոջ որդու զորացրման խնջույքից հետո. մանրամասներ
ՎԻԴԵՈՈստիկանությունը տեսանյութ է ներկայացրել սեպտեմբերի 18-ին Երեւանում դանակահարված Հարութ Գալստյանի (Կոնդեցի Հարութի) սպանության վերաբերյալ:
Սեպտեմբերի 18-ին, ժամը 23:30-ի սահմանում «Արամյանց» բժշկական կենտրոն ահազանգ է ստացվել, որ Երեւանի Չկալովի փողոցում ապրող 41-ամյա Հարություն Գալստյանը տեղափոխվել է իրենց մոտ: Բժիշկները նրա մոտ ախտորոշել էին կրծքավանդակի ծակած վերք: Գալստյանը հիվանդանոց հասնելուց րոպեներ հետո մահացել էր:
Պարզվել է, որ դանակահարվելուց հետո Հարություն Գալստյանը Պարոնյան փողոցով միայնակ քայլել է «Արամյանց» բժշկական կենտրոն: Հասել էր հիվանդանոց եւ գիտակցությունը կորցրել:
Պարզվել է նաեւ, որ դեպքից մի քանի րոպե առաջ նա մի քանի հոգու հետ եղել էր ընկերոջ տանը՝ որդու զորացրման առիթով:
Նախնական տվյալներով՝ նրանք խմել էին: Հարություն Գալստյանը ընկերոջ տնից մի քանի րոպեով դուրս էր եկել: Ներկաներից մեկը նկատելով, որ ուշանում է՝ ինքն էլ էր դուրս եկել: Հանդիպելով փողոցում, նրանք վիճել էին, որն ավարտվել էր Հարություն Գալստյանի դանակահարությամբ:
Պարզվել է՝ դանակահարողը Երեւանի բնակիչ Արտակ Հովհաննիսյանն է. նրա նկատմամաբ հայտարարվել էր հետախուզում: Արտակ Հովհաննիսյանն ինքնակամ ներկայացել էր ոստիկանություն եւ կալանավորվել:
