«Հայրս նորից է ամուսնացել, հպարտ եմ, որ երջանիկ ընտանիք է կազմել, ես էլ 2 տարեկան եղբայր ունեմ»․ Էվա Խաչատրյան
ՖՈՏՈ«Հայրս նորից է ամուսնացել, հպարտ եմ, որ երջանիկ ընտանիք է կազմել, ես էլ 2 տարեկան եղբայր ունեմ»: Էվա Խաչատրյանն այսօր նշում է 29-ամյակը։ Դերասանուհու խոսքով՝ վերջին տարիներին տարեդարձն անցկացնում է աշխատանքային մթնոլորտում։ Ըստ Էվայի՝ Կամերային թատրոնի բeմում ստացած էմոցիաները տարեդարձի լավագույն նվերն են։ Այս տարի ևս դերասանուհու օրն աշխատանքային է՝ նախ ֆոտոշարք է անցնելու, ապա ներկայացում է խաղալու։
Tert.am Life-ը Էվայի հետ զրուցել է մեծանալու, նպատակների և ամուսնության վերաբերյալ իր մտորումների մասին։
«Իհարկե, շատ եմ սիրում իմ տարեդարձի օրը, երջանիկ եմ, որ ծնվել եմ։ Մոտ յոթ տարի է՝ տարեդարձս ներկայացումներով եմ նշում և է՛լ ավելի մեծ սիրով եմ բեմ բարձրանում։ Կամերային թատրոնում ավանդույթ ունենք՝ ներկայացման ավարտին հանդիսատեսի հետ նշում ենք հոբելյարի տարեդարձ, ծափահարում են, երգում ենք. շատ էմոցիոնալ ու գեղեցիկ պահ է ստացվում։ Թե օրս ինչպես նշռեմ, ամեն տարի որոշում եմ՝ կախված իմ ֆինանսական վիճակից և ցանկություններից»,-ասաց Էվան։
Դերասանուհին ներկայումս աշխատանքային բուռն շրջանում է, Ելենա Արշակյանի նոր՝ «Սիրուն Սոնա» նախագծի նկարահանումների շրջանակում երկու օրից մեկնելու է Շրի Լանկա։ Չնայած ճամպրուկային տրամադրությանը՝ Էվան հասցրել է հյուրեր ընդունել տարեդարձի առթիվ. կեսգիշերին նրան ուրախացրել են ընկերները․ «Տարեդարձս կեսգիշերից է սկսվում, առաջինը մայրիկս է շնորհավորում, հետո լավ ընկերներս։ Այս տարի դեռ մի քանի օր առաջ եմ սկսել նվերներ ստանալ, իսկ երեկ երեկոյան շատ ուրախ հյուրեր ունեցա, ինչն ինձ համար անսպասելի էր»։
Էվայի խոսքով՝ մեծանալու վախ չունի, սակայն տարիքի մասին մտորումներ, երբեմն, ունենում է․ «Վստահ եմ, որ յուրաքանչյուր տարիք պետք է ապրել սիրով։ Անգամ մեծ ցանկության դեպքում երբեք չես կարող ժամանակը հետ կամ առաջ տալ։ Կարծում եմ՝ մարդը որքան մեծանում է, այնքան ավելի խորն է կյանքն ընկալում, հայացքներն են փոխվում։ Մեծանալու անխուսափելի երևույթին կարելի է ուրիշ դիտանկյունից նայել և գնահատել դրա դրական կողմերը»։
Դերասանուհին նշեց, որ մեկ տարով էլ մոտեցավ կյանքի երրորդ տասնամյակին։ Չնայած նա հաճախ է լսում տեսակետ, որ 30-ից հետո տարիներն ավելի արագ են անցնում, թվերի վրա կենտրոնանալ չի ցանկանում․ «Իմ կյանքում ամեն ինչ շատ լավ է, չեմ ուզում ինձ ծանրաբեռնել տարիքի հետ կապված մտորումներով։ Եթե կյանքումս թերի կողմեր էլ կան, ամեն ինչ կգնա դեպի լավը, որովհետև ես հավատում եմ Աստծուն, հավատում եմ հրաշքների և իմ ուժերին։ Առայժմ որքան նպատակ ունեցել եմ, կարողացել եմ իրագործել։ Ունեմ սիրելի աշխատանք, լավ ընկերներ, լավ գործընկերներ, պահանջված դերասանուհի եմ և դժգոհելու որևէ առիթ չկա»։
Ինչ վերաբերում է անձնական կյանքին՝ Էվան նշեց, որ այն հանրայնացնել չի սիրում, թեև ամուսնանալու հետ կապված տարատեսակ հարցեր երբեմն տալիս են իրեն․ «Ամուսնանալու հետ կապված շատ հարցեր տվողներ չկան, որովհետև, ցավոք սրտի, բարեկամաշատ ընտանիք չունեմ, իսկ նման հարցեր հիմնականում հնչեցնում են ազգականները։ Առհասարակ, այնպես չէ, որ այս աշխարհում բոլորը պետք է պարտադիր ամուսնանան։ Նյարդայնանալու առիթ չունեմ, որովհետև ամուսնությունը կանոն չէ, այլ ցանկություն, յուրաքանչյուր մարդ ինքը պետք է որոշում կայացնի։ Երբ կնոջ կյանքում հասունանում է ամուսնանալու և, հատկապես, մայրանալու ցանկությունը, նա ամեն ինչ անում է դա իրագործելու համար։ Կարծում եմ՝ նորմալ երևույթ չէ ուղղակի ամուսնանալ ամուսնանալու համար, հենց դա է պատճառը, որ մեր երկրում բաժանություններն այդքան շատ են լինում»։
Դերասանուհու խոսքով՝ իրեն զարմացնում է փաստը, որ 20 տարեկանից հետո մարսիկ սկսւմ են մտածել անպայման ամուսնանալու մասին․ «Մարդիկ մտածում են, որ եթե աղջիկը հատեց 20-ի սահմանը, անպայման պետք է ամուսնանա, ինչո՞ւ, ո՞վ է դա որոշում կամ սահմանում։ Հայրս երկրորդ անգամ է ամուսնացել, հպարտ եմ, որ նա երջանիկ ընտանիք է կազմել, ես էլ 2 տարեկան եղբայր ունեմ։ Իր կինը բավականին հասուն տարիքում է ունեցել իր առաջնեկին, որը հիմա բոլորիս երջանկություն է պարգևում։ Այս օրինակով ուզում եմ ասել՝ ի՞նչ իմաստ կա շտապելու, եթե երջանկությունդ ամեն վայրկյան կարող է ինքնուրույն գտնել քեզ: Պետք չէ ժամ առ ժամ դասավորել կյանքը, դու դա կարող ես անել, օրինակ, աշխատանքային նպատակներիդ, բայց ոչ զգացմունքներիդ հետ»։
Էվան ժպիտով նշեց, որ փոքրիկ եղբայրն իրենց ընտանիքի երջանկությունն է․ «Նա բոլորիս է ուրախացնում, այդ թվում՝ մայրիկիս, քանի որ մեզ մոտ շատ դրական հարաբերություններ են։ Ինքս էլ տոները շատ հաճախ հայրիկիս երկրորդ ընտանիքի հետ եմ անցկացնում, ուրախ եմ նրանց համար»։
Աղբյուր՝ tert.am
