«Արմավիր» ՔԿՀ-ում մահացած Անզորի մահվան պատճառները պարզելու համար փաստաբանը նոր միջնորդություններ են ներկայացրել

«Արմավիր» ՔԿՀ-ում հունվարի 4-ին կախված հայտնաբերված կալանավոր, 21-ամյա Անզոր Կարապետյանի իրավահաջորդի ներկայացուցիչը նոր միջնորդություններ է ներկայացրել, որոնց նպատակն է պարզել` ինչը կարող էր Անզոր Կարապետյանի ինքնասպանության պատճառ դառնալ:

«Մի քանի գործողություններ կան, որ ՔԿՀ-ն պիտի ապահովեր: Մենք միջնորդություններ ենք ներկայացնում`պարզելու համար հոգեբանի, սոցիալական աշխատողի հետ հանդիպոււմ եղել է, թե ոչ: Հասկանալու համար ինչը կարող էր դրդել Անզոր Կարապետյանին ինքնասպանության»,- NEWS.am-ի հետ զրույցում ասաց փաստաբան Անի Չատինյանը:

Հիշեցնենք, որ ըստ դատահոգեբանի եզրակացության` Անզոր Կարապետյանի անհատական հոգեբանական առանձնահատկությունները չէին կարող այնպիսի ազդեցություն ունենալ նրա վարքի վրա, որը կհանգեցներ ինքնասպանության:

Միեւնույն ժամանակ փորձագետը նշել էր, որ համապատասխան տեղեկությունների բացակայության պատճառով հնարավոր չէ ախտորոշել Ա. Կարապետյանի հոգեվիճակը՝ մահվանը նախորդած ժամանակահատվածում:

Հիշեցնենք, որ Անզոր Կարապետյանի հարազատները չեն հավատում մահվան պաշտոնական վարկածին, որ նա ինքնասպան է եղել:

Անզոր Կարապետյանի մահվան վերաբերյալ պաշտոնական հաղորդագրություն չի եղել: 2016 թ. հունվարի 11-ին նրա հարազատները դիմել են Հելսինկյան քաղաքացիական ասամբլեայի Վանաձորի գրասենյակ, պատմել, որ հունվարի 4-ին «Արմավիր» ՔԿՀ-ից իրենց հայտնել են, որ Ա. Կարապետյանը ինքնասպանություն է գործել, մինչդեռ իրենք այդ վարկածին չեն հավատում, քանի որ 21-ամյա տղայի մարմնի վրա բռնության հետքեր են եղել, ներքին օրգանները վնասված են եղել:

Անզոր Կարապետյանը մահանալուց ժամեր առաջ է տեղափոխվել «Արմավիր» ՔԿՀ: Նա 2015 թ. դեկտեմբերի 31-ին Արմավիր քաղաքում մասնակցել է ծեծկռտուքի, ինչից հետո ներկայացել է ոստիկանություն, նրան ձերբակալել են, այնուհետեւ՝ 2016 թ. հունվարի 3-ի երեկոյան դատարանի որոշմամբ կալանավորել եւ տեղափոխել «Արմավիր» ՔԿՀ: