Գագիկ Ծառուկյանի դստեր և Խաչատուր Սուքիասյանի որդու անչափ գեղեցիկ հարսանիքը

Նախօրեին Աբովյանի Սուրբ Հովհաննես Մկրտիչ եկեղեցում տեղի ունեցավ «Բարգավաճ Հայաստան» կուսակցության ղեկավար Գագիկ Ծառուկյանի դստեր՝ Անահիտի և գործարար Խաչատուր Սուքիասյանի որդու՝ Ալբերտի պսակադրությունը։

Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը և Մեծի տանն Կիլիկիո Արամ Առաջին կաթողիկոսն ուղերձներ էին հղել նորապսակներին և նրանց ընտանիքներին, որոնք ընթերցվեցին եկեղեցում պսակադրության ժամանակ: Եկեղեցին ամբողջությամբ զարդարված էր ծաղիկներով, մոմերով և այլ զարդարանքներով: Պսակադրության արարողությունից հետո նորապսակներն աղավնիներ բաց թողեցին երկինք՝ ի նշան երջանիկ ու խաղաղ ապագայի:

Այնուհետև հարսանեկան արարողությունը շարունակվեց «Փարավոն» ռեստորանային համալիրում, որն օրեր շարունակ նախապատրաստվել, զարդարվել էր Անահիտի և Ալբերտի հարսանյաց արարողության համար: Հարսանեկան խնջույքին մասնակցում էին ներկա և նախկին պատգամավորներ, բարձրաստիճան պաշտոնյաներ, հասարակական գործիչներ, երկու ընտանիքների հյուրերը՝ այդ թվում նաև վարչապետ Փաշինյանը դուստրերի հետ, ովքեր եկել էին իրենց անկեղծ շնորհավորանքները հղելու նորապսակ զույգին:

Արարողությունն ուղեկցվեց գեղեցիկ շոու ծրագրով։ Նրանց իրենց երգերով շնորհավորեցին հայ և արտասահմանյան կատարողները, այդ թվում՝ Աբրահամ Ռուսոն, Սոֆյա Ռոտարուն, Ձախ Հարութը, Վալերի Մելաձեն, Արման Հովհաննիսյանը և այլք:

Շնորհավորում ենք նորապսակներին՝ մաղթելով երջանիկ կյանք և հարատև սեր: