Ֆրանսիացի ճանապարհորդը տակառով անցել է Ատլանտյան օվկիանոսը
ՀԱՍԱՐԱԿՈՒԹՅՈՒՆՖրանսիացի տարեց ճանապարհորդ Ժան Ժակ Սավենին հաջողվել է տակառով անցնել Ատլանտյան օվկիանոսը շաբաթ երեկոյան (Փարիզի ժամանակով), հաղորդում է ՌԻԱ Նովոստի-ն՝ հղում անելով Ֆրանս Պրես գործակալությանը, որը հրապարակել էր ֆրանսիացու էլեկտրոնային նամակը:
Ավելի վաղ հաղորդվում էր, որ 72-ամյա տղամարդն սկսել է իր ճանապարհորդությունը Էլ Յերո փոքրիկ կղզուց, որը ներառված է Կանարյան կղզիների կազմում: Նա պետք է հասներ Կարիբյան կղզիներ 3 ամիս անց՝ 2019 թվականի մարտին: Ֆրանսիացու տակառն ունի երեք մետր երկարություն, երկու մետր տրամագիծ եւ կշռում է 450 կգ:
«122 օր եւ 9 ժամ անց ես հատել եմ միջօրեականը, ինչը նշանակում է, որ ես գտնվում եմ Կարիբյան ծովում: Հատումը (օվկիանոսի-խմբ.) ավարտված է: Բոլորին շնորհակալություն»,-գործակալությունը փոխանցում է Ժան Ժակ Սավենի խոսքերը:
Նա հայտնել է, որ ցանկանում է նավահանգիստ գտնել, որտեղ կարող է դուրս գալ տակառից, եւ հավելել է, որ ներկայումս նա «սկսել է լողալ Ֆլորիդայի ուղղությամբ»: Այնուհետեւ նա պատրաստվում է գտնել բեռնատար նավ, որը կարող է նրան տակառի հետ միասին հասցնել լավագույն դեպքում դեպի Մարտինիկա, որտեղ ֆրանսիացուն սպասում են իր տիկինն ու ընկերները:
Բացի այդ, ճանապարհորդը հայտարարել է, որ հետագայում պատրաստվում է լողալով հատել Լա Մանշ նեղուցը:
