Մանե Թանդիլյանի՝ իշխանություններին հաճոյանալու էժանագին փորձը

Օրերս ԱԺ-ում քննարկված և քվեարկությամբ առաջին ընթերցմամբ ընդունված օրինագիծը՝ ցեմենտի ներմուծման վրա պետտուրք դնելու, բայց այն կլինկերի վրա չկիրառելու մասին օրինագիծը դեռ շարունակում է քննարկվել հասարակության տարբեր շերտերի շրջանում: Հասկանալի է, որ այս օրինագիծը բնավ միտված չէր տեղական արտադրողին պաշտպանելու համար, քանզի ի վերջո շուկայում ազատ մրցակցային պայմաններն այդպես էլ չապահովվեցին, քանզի կլինկերի ներմուծումը, որը ցեմենտի արտադրության հիմնական բաղադրիչն է, առանց պետտուրքի է լինելու, ինչը հնարավորություն կտա դրանով աշխատող արտադրամասերին ավելի էժան ցեմենտ ստանալ, ինչը մրցակցությունից դուրս կթողնի տեղական հումքով աշխատող խոշոր՝ «ԱրարատՑեմենտ» և «ՀրազդանՑեմենտ» գործարաններին: ԱԺ-ում ԲՀԿ և ԼՀԿ խմբակցությունների մտահոգություններն այս մասով ամբողջությամբ հասկանալի էին և տրամաբանական, այստեղ ոչ մի շահերի բախում չկա, ինչպես փորձում են ներկայացնել որոշ գործիչներ, այդ թվում նաև ԼՀԿ պատգամավոր Մանե Թանդիլյանը: Հասարակ տրամաբանություն է, այն պահից սկսած, երբ տեղական հումքով աշխատող գործարանները դադարեն աշխատել այդ հումքով և կլինկեր ներմուծեն, նրանք ստիպված են լինելու տեղական հումքի մշակման իրենց արտադրական գիծը վաճառել, քանզի դրա առկայությունն այլևս պետք չի լինելու և հենց այդ ժամանակ, երբ հարևան պետությունները կտեսնեն դա, արդեն իրենց գինը կսկսեն թելադրել ցեմենտի, մասնավորապես կլինկերի ներմուծման վրա, քանի որ տեղական շուկայում մրցակցություն առաջադրող ոչ մի ընկերություն չի լինի այլևս: Երկրորդ, կլինկերով աշխատելու դեպքում երկու ցեմենտի գործարաններն էլ ստիպված են լինելու կրճատել իրենց անձնակազմը, ինչի արդյունքում շուրջ 1500 մարդ կդառնա գործազուրկ: Երրորդ, բազմաթիվ փորձագետներ նշում են, որ տեղական ցեմենտը շատ ավելի որակյալ է քան Իրանից ներկրվողը, քանի որ գիպսի պարունակությունը ներկրվողի մեջ շատ է, իսկ բետոնի ամրության տեսանկյունից դա ձեռնտու չէ շինարարին, անգամ վտանգավոր և շատերը հենց այս հանգամանքից ելնելով էլ իրենց շինությունները սարքում են տեղական ցեմենտով: Եվ վերջին հաշվով, պետության համար ռազմավարական նշանակության արտադրությանը խոչընդոտելը, պետությանն այդ առումով շրջափակման մեջ դնելը, ամենամեծ սխալն է այս պարագայում:
Հիմա այս բոլոր թերությունները երբ ԱԺ-ում բարձրաձայնվում էին ու հիմնավորումներ էին ներկայացվում, Մանե Թանդիլյանն այնտեղ նստած էր և հենց ինքն էլ դեմ քվեարկեց այդ օրինագծին, իսկ այսօր հայտարարում է, թե դա Գագիկ Ծառուկյանի շահերը սպասարկելու համար էր արվում: Առնվազն անազնիվ է Մանե Թանդիլյանը և սա էժանագին հնարք է՝ իշխանություններին հաճոյանալու համար, հակառակ պարագայում, Մանե Թանդիլյանը իր դիրքորոշման մեջ կլիներ ավելի օբյեկտիվ և քաղաքական առումով, սա ոչ այլ ինչ է քան մանիպուլացիա, երբ փորձ է արվում խեղել հասարակության գիտակցությունն ու ներկայացնել իրավիճակը բոլորովին այլ ենթատեքստով, որն իրականում, գոյություն չունի, դա զուտ երևակայության արդյունք է:
Կողմնորոշվեք տիկին Թանդիլյան, Դուք մնացել եք իշխանության և ընդդիմության արանքում, դա քաղաքական կատեգորիա չէ, կողմնորոշվեք...