Ես ռուսական գազի գնի նվազեցման հույս ունեմ. Փաշինյան
ՀԱՍԱՐԱԿՈՒԹՅՈՒՆԵվրԱզԷՍ-ի տարածքում ռուսական գազի գինը անչափ զգայուն հարց է: Հայաստանի վարչապետ Նիկոլ Փաշինյանն այս մասին ասել է ՌԲԿ հեռուստաալիքի հետ հարցազրույցում:
Փաշինյանը նշել է, թե կարեւոր է այն պայմանավորվածությունը, որ 2019 թվականին Հայաստանի սպառողների համար գազի գինը չի փոխվի. «Մենք քննարկումները կշարունակենք այս տարվա ընթացքում, որ գազի գնի հարցում համաձայնության հասնենք»:
Ի պատսխան հարցին՝ հնարավո՞ր է, որ տարեվերջին Հայաստանում գազի գինը բարձրանա, Փաշինյանը նշել է. «Իսկ ինչո՞ւ եք այդպես կարծում: Ես հույս ունեմ, որ հակառակը՝ կլինի գների նվազում»:
Հիշեցնենք, որ «Գազպրոմի» հայտարարության համաձայն՝ 2019 թվականի հունվարի 1-ից Վրաստանի եւ Հայաստանի սահմանին ռուսական գազի գինը կազմում է հազար խոր.մետրի դիմաց 165 դոլար:
2018 թվականին Հայաստանի համար գազի գինը կազմում էր հազար խոր.մետրի դիմաց 150 դոլար: Հայաստանի ներքին շուկայում գազամատակարարը «Գազպրոմի» դուստր ընկերություն «Գազպրոմ Արմենիան» է: «Գազպրոմ էքսպորտ» ԲԲԸ-ի եւ «Գազպրոմ Արմենիա» ՓԲԸ-ի միջեւ տարեկան 2,5 մլրդ խոր.մետր ռուսական գազի մատակարարման պայմանագիրը գործում է մինչեւ 2019 թվականի վերջը:
