Սեդրակ Նազարյանի ընտանիքին օգնելու համար դրամահավաքը ընդամենը 2 ժամ է տեւել. պատճառների մասին չեն խոսում

Երեւանի Հյուսիսային պողոտայում «Սասնա ծռեր» խմբի անդամ Սեդրակ Նազարյանի ընտանիքին օգնելու նպատակով օգոստոսի 18-ին եւ 19-ին կազմակերպված դրամահավաքը տեղի է ունեցել ընդամենը երկու ժամ: Այս մասին այսօր՝ օգոստոսի 23-ին, NEWS.am-ի հետ զրույցում ասաց դրամահավաքի կազմակերպիչներից Նելլի Մինասյանը: Նա չցանկացավ նշել՝ ինչու տեղի չի ունեցել նախատեսված դրամահավաքը, միայն տեղեկացրեց, որ օգոստոսի 18-ին երկու ժամ տեւած դրամահավաքի արդյունքում հավաքված 65 հազար գումարն արդեն փոխանցվել է Սեդրակ Նազարյանի ընտանիքին:

Սեդրակ Նազարյանի հարազատները նույնպես չմանրամասնեցին՝ ինչ պատճառներով դրամահավաքը տեղի չի ունեցել:

Նշենք, որ Սյունիքի մարզի Սպանդարյան գյուղում բնակվող Սեդրակ Նազարյանի տարեց ծնողները Սեդրակի կալանավորումից հետո ծանր սոցիալական պայմաններում են հայտնվել, նրանք ապրում են 42 հազար դրամ թոշակով:

Հիշեցնենք, որ Սեդրակ Նազարյանին մեղադրանք է առաջադրվել Քրեական օրենսգրքի 218-րդ հոդվածի 3-րդ մասի 1-ին կետով (պատանդ վերցնելը, որը կատարվել է կազմակերպված խմբի կողմից), 219-րդ հոդվածի 3-րդ մասի 1-ին կետով (շենքեր, շինություններ, տրանսպորտի, հաղորդակցության կամ կապի միջոցներ զավթելը, որը կատարվել է կազմակերպված խմբի կողմից) եւ 235-րդ հոդվածի 3-րդ մասով (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, որը կատարվել է կազմակերպված խմբի կողմից)։ Ըստ փաստաբանների՝ Սեդրակ Նազարյանը հայտարարել է, որ մեղադրանքն իրեն պարզ չէ, հրաժարվել է ցուցմունք տալ ու հարցերին պատասխանել, քանի որ 12 օր ապօրինի զրկվել է ազատությունից եւ արտաքին աշխարհի հետ որեւէ կապից: