Ինչ կձեռնարկի ոստիկանությունը սուպերմարկետներին ապրանք մատակարարողների ժամային գրաֆիկը կարգավորելու համար
ՊԱՏՄՈՒԹՅԱՆ ԱՅՍ ՕՐԸ
«Իրավունք»-ի տեղեկություններով` սուպերմարկետներ ապրանք մատակարարողների ժամային ոչ հստակ գրաֆիկը մտահոգում է ՀՀ ոստիկանությանը, քանի որ այն առաջացնում է խցանումներ մայրաքաղաքի կենտրոնում:
Մեր տեղեկություններով` ոստիկանությունը ի դեմս փոխոստիկանապետ Սամվել Հովհաննիսյանը փորձում է հարցը կարգավորել հստակ ժամեր սահմանելով ապրանք մատակարարողների համար: Մեր տեղեկությունները հաստատեց ՀՀ ոստիկանությունը:
«Երթևեկության համար «պիկ» ժամերին Երևան քաղաքի կենտրոնական հատվածում հապաղումներից և հատկապես խցանումներից խուսափելու նպատակով Հայաստանի Հանրապետության Նախագահի մոտ 2015 թվականի սեպտեմբերի 11-ին կայացած խորհրդակցության արդյունքներով տրված հանձնարարականի կետերի կատարումն ապահովելու նպատակով ՀՀ ոստիկանության պետի տեղակալ, ոստիկանության գնդապետ Ս. Հովհաննիսյանի նախագահությամբ ստեղծված Ճանապարհային երթևեկության կարգավորման ոլորտում առկա խնդիրները մշտադիտակելու, բարեփոխումների ընթացքը համակարգելու և հեռանկարային ծրագրեր առաջարկելու նպատակով ստեղծված հանձնաժողովում ուսումնասիրվում է տարբեր սպասարկման ծառայություններ մատուցող, այդ թվում նաև սուպերմարկետներին ապրանք մատակարարող տրանսպորտային միջոցների համար համապատասխան ժամային գրաֆիկներ սահմանելու հնարավորությունը։ Խնդիրը առայժմ գտնվում է ուսումնասիրման և քննարկման փուլում»,- ասվում է ոստիկանությունից մեր հարցման գրավոր պատասխանում:
Սոնա Դավթյան
