Հիվանդ առյուծն ապաքինվել է «սիրահարվելու» շնորհիվ (լուսանկարներ)
ԱՄԵՆԱԸՆԹԵՐՑՎԱԾ
ԱՄՆ Տեխաս նահանգի In-Sync Exotics կենտրոնը, որը զբաղվում է վայրի կենդանիների փրկությամբ, փրկել է Քան և Շեյլա մականուններով առյուծներին:
Ինչպես նշում է Boredpanda.com կայքը, Քանն ու Շեյլան պատկանել են մի մարդու, ով նրանց և բազմաթիվ այլ առյուծների օգտագործել է գումարի դիմաց լուսանկարելու և երեկույթների ժամանակ զվարճանալու համար: Կենդանիներին փրկելուց հետո պարզվել է, որ 6-ամյա Քանը թերսնման խնդիր ունի, իսկ նրա պոչի ծայրը կրծած է եղել, սակայն նրա թեթև բնավորության շնորհիվ բուժումը հեշտ է անցել:
Կայքը գրում է, որ 15 ամսական Շեյլան այնքան թույլ է եղել, որ նույնիսկ չի կարողացել ոտքի կանգնել: Նա անշարժ պառկած է եղել և անընդհատ փսխել է, սակայն կենտրոնի աշխատակիցները որոշել են չհանձնվել:
«Երկու շաբաթ շարունակ ձեռքով ենք կերակրել Շեյլային. մսի գնդիկներ ենք պատրաստել և նրա բերանը մտցրել»,- պատմել է կենտրոնի աշխատակիցներից մեկը:
Նա նաև պատմել է, որ կենդանին ծանր հիվանդությամբ է տառապել, որն ախորժակի կորստի և լեթարգիայի է հանգեցնում:
«Ապաքինվելը ժամանակ պահանջեց, բայց այժմ երկուսն էլ լավ են»,- հավելել է խնամողը:
Նրա խոսքով` առյուծներին բնակեցրել են իրար մոտ, և դա եղել է սեր առաջին հայացքից: Երեք ամիս շարունակ «ժամադրվելուց» հետո կենդանիներին թույլ են տվել «ամուսնանալ», և այդ պահից ի վեր նրանք նույն արգելոցում են ապրում:
