Քննչական կոմիտեն նոր մանրամասներ է ներկայացրել Կարո Կարապետյանի սպանության դեպքի վերաբերյալ
ՀԱՍԱՐԱԿՈՒԹՅՈՒՆՀայաստանի Հանրապետության քննչական կոմիտեն նոր մանրամասներ է հաղորդում Ազգային ժողովի նախկին պատգամավոր Կարո Կարապետյանի սպանության դեպքի վերաբերյալ: Ինչպես հաղորդում է «Արմենպրես»-ը, ՀՀ քննչական կոմիտեի մամուլի խոսնակ Սոնա Տռուզյանը «Ֆեյսբուք»-ի իր էջում գրառում է կատարել, որում մանրամասներ է հաղորդել դեպքի վերաբերյալ:
«2018 թվականի հոկտեմբերի 6-ի ուշ երեկոյան ՀՀ ՔԿ Երևանի քննչական վարչության Կենտրոն և Նորք-Մարաշ վարչական շրջանների քննչական բաժնում ահազանգ է ստացվել, որ մայրաքաղաքի կենտրոնում գործող «Այգի» ռեստորանային համալիրում հնչել են կրակոցներ, կան տուժածներ։
Նախնական տվյալներով՝ ռեստորանային համալիրում առաջացած վիճաբանության ժամանակ արձակվել են կրակոցներ, որի հետեւանքով կյանքի հետ անհամատեղելի հրազենային վնասվածքներ է ստացել ԱԺ նախկին պատգամավոր Կարո Կարապետյանը. վերջինս տեղափոխվել է «Էրեբունի» բժշկական կենտրոն, որտեղ արձանագրվել է նրա կենսաբանական մահը։ Նույն վիճաբանության ժամանակ հրազենային վնասվածք է ստացել նաեւ մեկ այլ քաղաքացի, ով տեղափոխվել է բժշկական կենտրոն։
Դեպքի վայրում այս պահին աշխատում է քննչական-օպերատիվ խումբը և ձեռնարկվում են անհետաձգելի միջոցառումներ՝ դեպքի բոլոր հանգամանքները պարզելու, առերեւույթ հանցագործություն կատարած անձին հայտնաբերելու ուղղությամբ։
Հարուցվել է քրեական գործ՝ ՀՀ քրեական օրենսգրքի 104-րդ և 235-րդ հոդվածների հատկանիշներով»,- գրել է Տռուզյանը:
