ՌԴ-ն ու ՀՀ-ն պայմանավորվել են աշխատել ռուսական գազի գնագոյացման հարցերի շուրջ
ՔԱՂԱՔԱԿԱՆՈՒԹՅՈՒՆ
ՌԴ նախագահ Վլադիմիր Պուտինը եւ ՀՀ վարչապետ Նիկոլ Փաշինյանը շաբաթ օրը Մոսկվայում հանդիպման ժամանակ պայմանավորվել են աշխատել ռուսական գազի մատակարարման ժամանակ գնագոյացման հարցերի շուրջ, հայտնել է Փաշինյանը ՌԴ-ում գործող հայ գործարարների հետ հանդիպման ժամանակ, փոխանցում է ՏԱՍՍ-ը։
«Փաստացի ՌԴ-ից գազը Հայաստան է առաքվում բավականին ցածր գնով։ Սակայն խնդիրն այն է, որ սպառողները գազը ստանում են կրկնակի թանկ գնով։ Եվ մենք նախագահ Պուտինի հետ խոսել ենք, որ պետք է հասկանալ, թե ինչպես է այդ կրկնակի գինը գոյանում։ Անհրաժեշտ է ուսումնասիրել եւ հասկանալ, թե ինչպես է ընթանում գնագոյացման գործընթացն ու այդ մեխանիզմն ավելի արդյունավետ դարձնել․․․որ պայմաններն ավելի շահավետ լինեն։ Մենք պայմանավերվել ենք պարոն Պուտինի հետ, որ համատեղ կաշխատենք այդ ուղղությամբ»,-ասել է Փաշինյանը։
Նա պարզաբանել է, որ «Գազպրոմից» գազը ձեռք է բերում նրա դուստր ընկերությունը՝ «Գազպրոմ Արմենիան», որն էլ որոշում է սակագները երկրի ներսում։
Հիշեցնենք, որ Փաշինյանն ավելի վաղ հայտարարել էր, որ ՌԴ-ն Հայաստանին գազը վաճառում է ցածր գնով, սակայն սպառողը դա չի զգում, եւ չի բացառել, որ դա կարող է կապված լինել վատ մենեջմենթի ու կոռուպցիայի հետ։ ՀՀ վարչապետի հետ հանդիպումից առաջ Պուտինը հիշեցրել է, որ «Գազպրոմը» Հայաստանին գազը վաճառում է աշխարհում ամենացածր գներից մեկով՝ 150 դոլար 1 խոր․ մետի դիմաց։
