Կոտայքի մարզպետը համայնքապետերի նկատմամբ իրականացվող վենդետայի փայլուն օրինակ է

Վազգեն Պետրոսյանը ֆեյսբուքյան իր էջում  գրում է.

Վերջին օրերին մամուլում շատ կհանդիպեք Կոտայքի մարզպետ՝ Ռոմանոս Պետրոսյանի վերաբերյալ նյութերի, ով կարծես թե փորձում է կադրային ջարդ իրականացնել հատկապես գյուղապետերի շրջանում։ Շատ են խոսակցությունները այն մասին, որ ՔՊ-ական մարզպետը գյուղապետերին կարգադրում է հրաժարվել պաշտոններից։ Հրահանգում է նաև, որ տեղի ունեցող իրադարձությունների մասին այստեղ այնտեղ չբարձրաձայնեն և սպառնում, որ ով բարձրաձայնի, ԱԱԾ-ի և մյուս պատկան մարմինների միջոցով գլխներին ինչ-որ մի գործ կսարքի։
Ռոմանոս Պետրոսյանը երևի թե չի գիտակցում, որ երկրում իրավիճակ է փոխվել և սպառնալիքներով հարցեր լուծելու ժամանակները վաղուց անցել են։ Պետք է գիտակցել, որ նման անառողջ մթնոլորտում համայնքապետերը չեն կարող լիակատար կերպով կատարել իրենց ուսերին դրված պարտականությունները։
Շատ լավ հիշում ենք վարչապետի խոսքերը, որ վենդետաներ չեն լինելու, սակայն համայնքապետերի նկատմամբ իրականացվող վենդետայի փայլուն օրինակ է հենց Ռոմանոս Պետրոսյանը: Կոտայքի մարզի գրեթե բոլոր համայնքներում մարդկանց համբերության բաժակը լցվել է և այլևս չեն կարողանում դիմանալ տիրող իրավիճակին, ինչը նոր Հայաստանում անընդունելի է և հուսանք, որ այս հարցը հնարավորինս շուտ խելամիտ լուծում կստանա։