Նիկոլի շարժումը հասավ իր գերնպատակին՝ հրաժարական տվեց Սերժ Սարգսյանը
ՀԱՍԱՐԱԿՈՒԹՅՈՒՆ
Նիկոլի շարժումն ունի ամենակարևոր հաղթանակը
Հայաստանում երկշաբաթյա համաժողովրդական ցույցերի արդյունքում ֆենոմենալ փոփոխություններ են տեղի ունենում: ՀՀԿ-ՆԻԿՈԼ հանդիպմանը Նիկոլ-հեղափոխական տրիբունը դարձավ ՆԻԿՈԼ-պետական գործիչ, ով սուր հարցերին պատասխանում է նույն բառապաշարով և համարյա թե նույն շեշտադրումներով, ինչ հանրապետականի կրթված փոքրաթիվ անդամները:
Նիկոլը կողմ է ԵԱՏՄ-ին, ՀԱՊԿ-ին, ԵՄ հետ 2017-ին Սերժ Սարգսյանի ստորագրած և վերջերս ԱԺ վավերացրած պայմանագրին, ԵԱՀԿ Մինսկի խմբի միջնորդությանը, բանակցային գործընթացում քաղաքական շարունակականությանը և այլն: Արտաքին քաղաքական օրակարգում, ինչը խիստ քննադատվում էր, ժանրի կանոններից ելնելով, Նիկոլի կողմից, այլևս անցյալում է:
Իհարկե կարծիք կա, որ Նիկոլ Փաշինյանը հատուկ էր ընտրել այս շեշտադրումները հանրապետականի շարքերից վեց հոգի իր կողմը գրավելու համար: Բայց այդ կուսակցության պատմության մեջ դեռևս չի եղել դեպք, երբ պատգամավորները շեղվեն վերևից իջեցված հրահանգից: Պարոն Փաշինյանը չի կարող անտեղյակ լինել դրանից:
Եվ ուրեմն Նիկոլը իրոք հեղափոխականից դառնում է պետական-քաղաքական գործիչ, ու դա Հայաստանի ժողովրդավարացման տեսանկյունից ամենալավ նորությունն է:
Միգուցե նաև մենք ականատեսն ենք լինում ամերիկյան ֆենոմենի: Հայտնի է, որ (բացառությամբ Թրամպի) ամերիկյան բոլոր նախագահները մի բան են փոխել իրենց կառավարման շրջանում՝ Օվալ օֆիսի աշխատասեղանին իրենց ընտանեկան նկարը: Մնացյալը իներցիայով հիմնականում շարունակվել է:
Այնուամենայնիվ պետք է արձանագրել, որ Նիկոլի շարժումը հասավ իր գերնպատակին՝ հրաժարական տվեց Սերժ Սարգսյանը, ընդունելով իր սխալը: Նիկոլը ու իր կողմնակիցները ունեն ամենակարևոր հաղթանակը:
