Գնացել է կենցաղային հարցեր պարզաբանելու և մահացու վիրավորել. Քննչական կոմիտե

ՀՀ քննչական կոմիտեի Երևան քաղաքի Աջափնյակ և Դավթաշեն վարչական շրջանների քննչական բաժնում ավարտվել է 54-ամյա տղամարդու սպանության դեպքի առթիվ քննվող քրեական գործի նախաքննությունը: Նախաքննությամբ պարզվել է առերևույթ հանցագործություն կատարած անձի ինքնությունը, շարժառիթը։

ՔԿ մամլո ծառայության փոխանցմամբ, 54-ամյա Վահան Աղաջանյանի դին՝ կրծքավանդակի շրջանում կտրած-ծակած բազմաթիվ վնասվածքներով, հայտնաբերվել է 2015թ. օգոստոսի 31-ին՝ Երևան քաղաքի իր բնակարանում։

Դեպքի առթիվ հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին մասի հատկանիշներով (սպանություն):

Քննությամբ հիմնավորվել է, որ դեպքի օրը Ռ. Մկրտումյանը, կենցաղային հարցերի շուրջ պարզաբանումներ պահանջելու կապակցությամբ, գնացել է Վ.Աղաջանյանի բնակարան և նախապես իր հետ վերցրած դանակով բազմաթիվ հարվածներ հասցրել նրա կրծքավանդակի շրջանին՝ պատճառելով կրծքավանդակի զույգ կեսերի առաջային մակերեսների ծակած-կտրած միջանցիկ վնասվածքներ, որի հետևանքով վերջինս մահացել է արյան սուր կորստից:

Ձեռք բերված ապացույցների համակցությամբ՝ Ռ.Մկրտումյանին մեղադրանք է առաջադրվել՝ ՀՀ քրեական օրենսգրքի 104-րդ հոդվածի 1-ին մասով:

Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին: Մեղադրական եզրակացությունը հաստատվել է, և գործն ուղարկվել դատարան։