Տոնական օրերին քաղաքացիների կողմից բարձրացված բոլորը հարցերը ստացել են օպերատիվ լուծում
ՀԱՍԱՐԱԿՈՒԹՅՈՒՆ
Երևանի քաղաքապետարանում տեղի ունեցած այս տարվա առաջին աշխատանքային խորհրդակցության ժամանակ, որը վարել է քաղաքապետ Տարոն Մարգարյանը, զեկուցվել է, որ ի կատարումն Երևանի քաղաքապետի հանձնարարականի` դեկտեմբերի 30-ից մինչև հունվարի 7-ը քաղաքացիների կողմից բարձրացված հարցերին արագ արձագանքելու, անհրաժեշտության դեպքում դրանց նաև օպերատիվ լուծումներ տալու նպատակով Երևանի քաղաքապետարանում և վարչական շրջանների աշխատակազմերում կազմակերպվել և պատշաճ իրականացվել է շուրջօրյա հերթապահություն: Ըստ այդմ, տոնական ոչ աշխատանքային օրերին քաղաքացիների կողմից բարձրացված բոլոր հարցերը ստացել են օպերատիվ լուծումներ:
Պատասխանատուները նաև զեկուցել են, որ նշված ժամանակահատվածում խստորեն վերահսկվել է ինչպես հասարակական տրանսպորտի աշխատանքը, այնպես էլ աղբահանության աշխատանքների կազմակերպումն ու իրականացումը:
Շուրջօրյա հսկողություն է իրականացվել նաև մայրաքաղաքի կրթական ու մշակութային հաստատությունների ջեռուցման և ջրամատակարարման համակարգերի նկատմամբ: Նշվել է, որ վերոնշյալ բոլոր հաստատությունների ջեռուցման համակարգերն աշխատել և աշխատում են անխափան:
Իր գոհունակությունը հայտնելով Երևանի քաղաքապետարանի և վարչական շրջանների աշխատակազմերի կողմից տոնական ոչ աշխատանքային օրերին շուրջօրյա հերթապահության աշխատանքների պատշաճ կազմակերպման համար՝ քաղաքապետ Տարոն Մարգարյանը նաև շնորհակալություն է հայտնել մայրաքաղաքի կենսապահովման ոլորտի ծառայություններ մատուցող ընկերություններին ու բոլոր այն ծառայություններին, որոնց հետ համագործակցված աշխատանքի արդյունքում ապահովվել են քաղաքացիների կողմից բարձրացված հարցերի արագ լուծումները:
Անդրադառնալով մայրաքաղաքի տոնական ձևավորման նկատմամբ սահմանված հսկողությանը՝ քաղաքապետ Տարոն Մարգարյանն աշխատակազմի արտաքին ձևավորման և գովազդի վարչությանն ու «Երքաղլույս» ընկերությանը հանձնարարել է շարունակել հսկողությունը մինչև հունվարի 13-ը, այնուհետ կազմակերպել դրանց ապամոնտաժումն ու պատշաճ պահեստավորումը:
