Կրթության և գիտության նախարարի կողմից հստակ խնդիր է դրվել. ԿԳ փոխնախարար

ՀՀ կրթության եւ գիտության նախարարի տեղակալ Մանուկ Մկրտչյանը երեկ խորհրդակցության է անցկացրել ավագ դպրոցների մի խումբ տնօրենների հետ: Փոխնախարարը նրանց տեղեկացրել է, որ նախարար Լեւոն Մկրտչյանի կողմից հստակ խնդիր է դրվել, որ ավագ դպրոցները պետք է ունենան զարգացման հեռանկար, ընդ որում յուրաքանչյուր դպրոցի համար այդ ծրագիրը պետք է լինի առանձնահատուկ: Ասել է թե՝ տնօրենները պետք է ներկայացնեն դպրոցի զարգացման ծրագիր:

Հայտնի է, սակայն, որ յուրաքանչյուր դպրոցում տնօրենի ընտրության ժամանակ թեկնածուները ներկայացնում են ուսումնական հաստատության զարգացման իրենց հայեցակարգը: Մանուկ Մկրտչյանն ընդգծել է, որ իրենք ակնկալում են նոր մոտեցումներով հագեցած ծրագրեր:

«Մեր խնդրանքն ու պահանջն է՝ դրսեւորել նոր մոտեցում: Մենք նաեւ խնդիր ենք դնում՝ շեշտադրել ոչ թե շենքային պայմանների ու նյութատեխնիկական բազայի բարելավումը, այլ առաջին հերթին դպրոցի բովանդակային զարգացման խնդիրները: Դպրոցների շենքային եւ տեխնիկական պայմանների բարելավումը չենք ուզում անտեսել, սա շատ կարեւոր հարց է, բայց նաեւ պետք է հասկանանք, որ պետությունն այս պահին բոլոր խնդիրները միանգամից լուծելու հնարավորություն չունի»,- նշել է Մանուկ Մկրտչյանը:

Մեր հարցին ի պատասխան, թե նախարարությունում ծանո՞թ են բոլոր տնօրենների նախորդ ծրագրերին եւ հնարավոր է՝ դրանցում նույնպես կան նոր մոտեցումներ, գերատեսչությունից նկատեցին, որ դրանք, որպես կանոն, շատ նման են լինում մեկը մյուսին: Նաեւ մանրամասնեցին, որ նպատակ կա ծանոթանալ տնօրենների դիտարկումներին, որոնք ավագ դպրոցների խնդիրը տեսնում են ներսից, ինչպես նաեւ լսել լուծման նրանց առաջարկները, որպեսզի դրանք ամփոփվելով՝ օրենսդրական նախաձեռնությունների տեսք ստանան:

Հիշեցնենք, որ ԿԳ նախարար Լեւոն Մկրտչյանը դեռ իր պաշտոնավարման առաջին օրերին հայտարարել էր, որ ավագ դպրոցներում առաջարկվող կրթության որակի հարցում կան լուրջ անելիքներ: