Երկրպագուների կարծիքով՝ զույգը բաժանվել է: Կասկածների առիթ հանդիսացավ այն, որ երևանյան երեկույթներից մեկին Վարուժանը ներկայացել է ոչ թե Քրիստինայի, ինչպես լինում է սովորաբար, այլ հանրությանն անծանոթ մի աղջկա հետ: Ուշադիր երկրպագուներն իրենց խմբում քննարկել են նաև այն փաստը, որ թե՛ Քրիստինան և թե՛ Վարուժանը սոցէջերից հեռացրել են իրենց համատեղ լուսանկարները: Բացի դրանից՝ Քրիստինան վերջին շրջանում համացանց է ներբեռնում համարձակ լուսանկարներ՝ գինով բաժակով, կարճ տոպերով, ինչը զույգի երկրպագուների համար ևս անսովոր էր, քանի որ սոցկայքերում Քրիստինան սովորաբար շատ համեստ ու աննկատ է իրեն պահում:

Պարզելու համար ասեկոսեների իսկությունը՝ BlogNews.am-ը կապ է հաստատել և՛ Քրիստինայի, և՛ Վարուժանի հետ: Հարցին՝ ճի՞շտ են արդյոք խոսակցությունները, որ զույգը բաժանվել է, Քրիստինան չցանկացավ պատասխանել: Դիտարկմանը, որ զույգը հեռացրել է համատեղ լուսանկարները, Քրիստինան ասաց, որ չի ուզում մեկնաբանել այդ փաստը: Վարուժանը ևս չցանկացավ պատասխանել «Ճի՞շտ է արդյոք, որ Վարուժան-Քրիստինա զույգը բաժանվել է» հարցին, փոխարենը մեկնաբանեց, թե ով է աղջիկը, ում հետ դերասանը ներկայացել է երեկույթին, իսկ հետո համատեղ լուսանկարը տեղադրել իր սոցէջում. «Լուսանկարի աղջիկն ընկեր է, զուտ ընկեր»: Դիտարկմանը, թե ինչու է Վարուժանն այդ երեկույթին ներկայացել ոչ թե Քրիստինայի, ինչպես սովորաբար է լինում, այլ անծանոթուհու հետ, Վարուժանն այսպես պատասխանեց. «Չեմ ուզում մանրանալ այս թեմայի շուրջ, կներեք»: