Զեղչում ենք ապրիլյան պատերազմի այն մասնակիցների ուսման վարձերը, որոնք փաստաթուղթ են ներկայացնում. Արամ Սիմոնյան
ՖՈՏՈ
Մամուլում այսօր նյութ էր հրապարակվել այն մասին , որ քառօրյա պատերազմի մասնակից երեք տասնյակից ավելի ուսանողների ուսման վարձերը զեղչելու խնդիրը լուծում չի ստանում և հատկապես ԵՊՀ–ում : Tert.am-ը խնդրի առնչությամբ զրուցել է ԵՊՀ ռեկտոր Արամ Սիմոնյանի հետ:
- Պարոն Սիմոնյան, ինչպե՞ս կմեկնաբանեք ԵՊՀ-ում ապրիլյան պատերազմի մասնակից ուսանողների ուսման վարձը զեղչելու հետ կապված խնդիրների հարցը ,որն ըստ մամուլի հրապարակման ամենից խնդրահարույցն է հենց Ձեր բուհում:
- Չկա այդպիսի բան, դա բացահայտ լուտանք է, որովհետև քառօրյա պատերազմի մասնակիցներին, եթե նրանք իսկապես մասնակից են և ունեն համապատասխան փաստաթուղթ, անկախ որևէ բանից, նրանց բոլորին զեղչում ենք մենք՝ նվազագույնը 50 տոկոս: Իսկ դրանք այն ուսանողներն են, ովքեր հայտարարում են, որ իրենք Քառօրյա պատերազմի մասնակից են բայց որևէ փաստաթուղթ չեն ներկայացնում։ Այսինքն՝ կարող է և խաբում են մեզ։ Ինչո՞ւ պետք է նրանց զեղչենք, եթե չկա համապատասխան նշում իրենց զինգրքույկում: Ի՞նչ եք կարծում, եթե մի մարդ եկավ բանավոր հայտարարեց, որ ինքը քառօրյայի մասնակից է, Դուք նրան կհավատա՞ք, բա պիտի փաստաթուղթ բերեն, ես ֆինանսական գործարք եմ անում:
- Մինչ այս պահը ապրիլյան պատերազմի մասնակից քանի՞ ուսանողի ուսման վարձն է զեղչել ԵՊՀ–ում:
- Հարյուրավոր մարդկանց, ապրիլյան պատերազմի մասնակից բոլորին, ովքեր բերում են փաստաթուղթ սուսուփուս, առանց որևէ բանի: Մի քանի հոգի եկել են հայտարարում են, որ ապրիլյանի մասնակից են՝ առանց որևէ փաստաթղթի, ինչի՞ ես նրանց պետք է զեղչեմ, սիրուն աչքերի՞ համար:
- Բայց հիմա նշումները զինգրքույկում արվում են, ինչո՞ւ չեն բերում համապատասխան փաստաթուղթը, ի՞նչ են պատճառաբանում:
- Ես չգիտեմ, ինչպես կարող է պատահել, որ իրենք բերեն փաստաթուղթը ներկայացնեն, մենք էլ ասենք՝ ոչ, չենք զեղչում: Ապրիլյան պատերազմին զոհված բոլոր ընտանիքների երեխաներին՝ 58 հոգու, ԵՊՀ-ն մինչև չափահաս դառնալը ամեն ամիս թոշակ է նշանակել: Եթե մենք դա անում ենք, ապրիլյանի մասնակցի դեպքում ինչո՞ւ չպետք է անենք զեղչը:
- Կոնկրետ թիվ կարո՞ղ եք նշել, թե՞ ապրիլյան պատերազմին մասնակից քանի ուսանողի է տրվել զեղչից օգտվելու հնարավորություն:
- Մոտ 60։ Ովքեր, որ ներկայացնում են փաստաթուղթ, ըստ Պաշտպանության նախարարության ներկայացրած կարգի, եթե նրանց ՄՈԳ-ը համապատասխանում է հինգ բալանոցի 3 գնահատականին, բոլորին զեղչում ենք, իսկ նրանք, ովքեր մի կերպ են սովորում, գալիս են ասում՝ մարտական հերթապահություն ենք անցկացրել, շատ դեպքերում չներկայացնելով համապատասխան փաստաթուղթ, նրանց ինչի՞ հիման վրա պետք է զեղչենք, բա չե՞ն գա ստուգողներն ու ասեն՝ այս ի՞նչ ես արել, ինչո՞ւ ես այս մարդկանց զեղչել առանց փաստաթղթի:
