Երևանի պետական համալսարանում գիտելիքից կարևոր փողն է
ԱՄԵՆԱԸՆԹԵՐՑՎԱԾ
Երեւանի պետական համալսարանի առաջնահերթությունների շարքում փողը կարեւոր տեղ է զբաղեցնում: Գիտելիքից ավելի այստեղ փողն արժե: Վճարունա՞կ ես, անբավարար առաջադիմությունը քեզ կներվի ընդհուպ մինչեւ ավարտական ուսումնական տարի, իսկ այ եթե ուսման վարձդ չես կարողանում ժամանակին մուծել, համալսարանում անելիք չունես:
Խնդրին ուշադրություն դարձնելու առիթն օրեր առաջ Երեւանի պետական համալսարանի ուսանողներից մեկի հետ տեղի ունեցածն էր, երբ նա չորրորդ կուրսում հեռացվել էր բուհից՝ երկրորդ կուրսից մնացած ակադեմիական պարտքի պատճառով: Այսինքն՝ թեեւ ունեցել էր չհանձնած քննություն, դա չէր խանգարել, որ նա փոխադրվի երրորդ, ապա չորրորդ կուրս, եւ այդ ընթացքում էլ ուսման վարձ վճարի:
Իսկ համալսարանում չեն կարծում, որ ակադեմիական պարտքը տարիներ շարունակ ներելով, միեւնույն քննությունը երեք անգամ հանձնել չհաջողած ուսանողին այդ բեռն ուսերին առած մինչեւ ավարտական կուրս հասնելու հնարավորություն տալը եւ այդ ընթացքում նրանից վարձավճար գանձելը արդարացի ու բարոյական չէ: Հետեւաբար ուսանողին առանց դիպլոմի հրաժեշտ տալիս գումարը վերադարձնելն էլ այստեղ տրամաբանական չեն համարում, ընդգծելով, որ դրա դիմաց նա կրթական ծառայություն է ստացել:
Այնինչ, նույնպիսի ըմբռնում, ինչպիսին ակադեմիական պարտքի դեպքում է, սովորողի նկատմամբ չի դրսեւորվում, եթե նա վարձավճարի խնդիր ունի: Երեկ ականատես եղանք, թե ինչպես իրավաբանական ֆակուլտետի երրորդ կուրսի ուսանողներից մեկի մայրը, պարբերաբար արցունքները զսպել չկարողանալով, մեկը մյուսի հետեւից բախում էր բուհի ղեկավարների դռները՝ խնդրելու մի քիչ էլ ժամանակ տրամադրել, որպեսզի կարողանա հայթայթել անհրաժեշտ գումարը: Այստեղ նրան կամ ընդունելության չէին արժանացնում, կամ կոպիտ տոնով պատասխանում էին, որ 640 հազար դրամ կազմող վարձի կեսը գոնե պետք է վճարել, ընդ որում՝ շատ շտապ, այլապես հեռացման հրամանն արդեն պատրաստ է: «Հիմա ես ինչ անեմ, ում սպանեմ, ումից գնամ գողություն անեմ»,- մեր զրույցում հուզված ասում էր ուսանողի մայրը: Նա, իմիջիայլոց, արձանագրում էր նաեւ համալսարանում առկա աննրբանկատության հանգամանքը, երբ կարող են համակուրսեցիների ներկայությամբ երեխային դիմել ու հայտարարել, որ նա վարձի պարտք ունի եւ առկա է հեռացման վտանգ:
Երեւանի պետական համալսարանի հասարակայնության հետ կապերի եւ լրատվության վարչության պետ Կարեն Գրիգորյանը, մեր հարցմանն ի պատասխան անդրադառնալով բուհում առկա իրարամերժ մոտեցումներին՝ կապված վարձի եւ քննական պարտքերի հետ, ասաց. «Դրանք իրար հետ ընդհանրապես կապ չունեցող հանգամանքներ են: Մեկը կրթական գործընթաց է, մյուսը՝ ֆինանսական: Մի պարագայում խոսքը վերաբերում է ուսման առաջադիմությանը: Այսինքն՝ ուսանողը առավելագույնը 12 կրեդիտ կազմող ակադեմիական պարտքը կարող է իր հետ տեղափոխել մինչեւ ավարտական կուրս: Բնականաբար, դրա համար էլ որոշակի սահման կա, այդ 12 կրեդիտը կարող է համընկնել երկու կամ երեք առարկայի հետ: Իսկ վարձավճարի պարագայում, այո՛, ամբողջությամբ պետք է վարձը վճարի, եթե իրեն օրենքով սահմանված զեղչեր չեն հասնում: Մի պարագայում մենք իրեն ծառայություն ենք մատուցել, այդ ծառայությունը ինքը ստացել է, ուղղակի դրա համար հանձնել է քննությունը կամ չի հանձնել, իսկ մյուս պարագայում մենք ընդամենը ասում ենք, որ քո ստացած ծառայության դիմաց դու վճարիր, որպեսզի մենք կարողանանք քեզ ծառայություն մատուցողին վճարել»:
Ինչ վերաբերում է Երեւանի պետական համալսարանում վարձավճարը մուծելու սահմանված ժամկետներին, ապա առաջին կուրսում դա մինչեւ սեպտեմբերի 15-ն է, իսկ մնացած կուրսերում՝ մինչեւ տվյալ կիսամյակի առաջին ամիսը, համապատասխանաբար՝ սեպտեմբերը եւ փետրվարից մինչեւ մարտի կեսը: «Բայց մենք ունենք հարյուրավոր դեպքեր, երբ որ ուսանողը ուսման վարձը վճարում է՝ ըստ իր ցանկացած գրաֆիկի: Դա կարող է լինել ամեն տարի, կարող է լինել ամեն կիսամյակ, կիսամյակում երկու անգամ կամ ամեն ամիս. ինչպես որ ուսանողին հարմար է»,- որպես առավելություն շեշտեց վարչության պետը: Նաեւ հավաստիացրեց, որ գերազանց առաջադիմություն ունեցող ուսանողները վարձի պատճառով բուհից դուրս չեն մնում:
«Այսինքն՝ մենք կարողանում ենք գտնել որեւիցե մի հնար՝ ինչ-որ մի զեղչային համակարգի կիրառմամբ, բարերարների միջոցով եւ այլն, տվյալ ուսանողի վարձը եթե ոչ ամբողջովին, ապա որոշակիորեն փոխհատուցել եւ այնպես անել, որ գերազանց սովորող, ապա լավ մասնագետ դարձող ուսանողը սոցիալական խնդիրների պատճառով համալսարանից չհեռացվի»,- շարունակեց Կարեն Գրիգորյանը:
Հ.Գ. Երեւանի պետական համալսարանից երեկ փոխանցեցին, որ բուհից տարեկան հեռացվում է շուրջ 350 ուսանող եւ նրանցից մոտավորապես 30-ի դեպքում է պատճառը կապվում վարձավճարի հետ:
