Որոնք են պատմության ընթացքում հայտնի անձանց կրած 10 ամենաթանկարժեք զգեստները (լուսանկարներ)

Հարուստները սիրում են ընդգծել իրենց սոցիալական կարգավիճակը թանկարժեք իրերով ու միայն ընտրյալների համար նախատեսված հաճույքներով, որոնց թվին են դասվում բացառիկ ու թանկարժեք զգեստները:

Tatler-ն ուշագրավ ֆոտոշարքով ի մի է բերել պատմության մեջ 10 ամենաթանկարժեք զգեստները, որոնք արևմտյան շոու բիզնեսի աստղերը տարբեր առիթներով կրել են կարմիր գորգին:

10. Շառլիզ Թերոն, զգեստը՝ Christian Dior, 100.000 դոլար

2013թ. դերասանուհին հեղինակավոր «Օսկար» կինոմրցանակաբաշխության ժամանակ կրել է սպիտակ զգեստ՝ զարդարված հարյուրավոր հատընտիր բյուրեղներով: Զգեստը կարվել է հատուկ Թերոնի համար:

9. Լյուպիտա Նիոնգո, զգեստը՝ Calvin Klein, 150.000 դոլար

2015թ. «Օսկար» մրցանակաբաշխությունից հետո դերասանուհի Լյուպիտա Նիոնգոյից գողացել են զգեստը, որով նա ներկայացել էր միջոցառմանը: Գողերն իմացել են, որ Calvin Klein զգեստն արժե 150.000 դոլար: Այն զարդարված էր 6.000 մարգարիտով: Զգեստը գտնվել է մի քանի օր անց։

8. Քեյթ Բլանշետ, զգեստը՝ Armani Privé, 200.000 դոլար

Դերասանուհին 2007թ. «Օսկար» մրցանակաբաշխությանը կրել է Swarovski բյուրեղներով զարդարված բացառիկ Armani զգեստ:

7. Արքայադուստր Դիանա, զգեստը՝ Victor Edelstein, 363.000 դոլար

1985թ., երբ ԱՄՆ նախագահ Ռոնալդ Ռեյգանն ավանդական պարահանդեսն էր հյուրընկալել Սպիտակ տանը, առաջին տիկին Նենսի Ռեյգանը մոտեցել է դերասան Ջոն Թրավոլտային ու հայտնել, որ արքայադուստր Դիանան ցանկանում է պարել իր հետ: Արդյունքում զույգն արել է պարահանդեսի բացումը: Դիտարժան միջոցառմանը Լեդի Դին կրել է մուգ կապույտ թավշից կարված Victor Edelstein զգեստ, որն ավելի ուշ աճուրդով վաճառվել է 363.000 դոլարով:

6. Ամալ Քլունի, զգեստը՝ Oscar de la Renta, 380.000 դոլար

Հոլիվուդյան դերասան Ջորջ Քլունիից ամուսնության առաջարկ ստանալուց հետո, միջազգային կարգի փաստաբան Ամալ Քլունին արդեն գիտեր, որ հարսանեկան զգեստը կարելու է Օսկար դե լա Ռենտան: Զգեստը կարելու համար պահանջվել է 4 ամիս: Այդ ընթացքում օգտագործվել է 13մ շանտիլյան ժանյակ, 14մ փղոսկրի գույնի շղարշ, իսկ սեղմիրանն ասեղնագործվել է ձեռքով: Այսպիսի գեղեցկության համար Ամալ Քլունին վճարել է 380.000 դոլար:

5. Քեյթ Միդլթոն, զգեստը՝ Sarah Burton for Alexander McQueen, 400.000 դոլար

Արքայազն Ուիլյամի հետ պսակադրությանը պատրաստվելիս ապագա դքսուհին դիմել է իր սիրած բրենդի՝ Alexander McQueen-ի կրեատիվ դիզայներ Սառա Բերթոնին, որը Միդլթոնի համար ստեղծել է արդեն դասական դարձած զգեստը: Այս շքեղությունն արժե 400.000 դոլար:

4. Imperial Pearl Syndicate հարսանեկան զգեստ, 500.000 դոլար

1952թ. Imperial Pearl Syndicate ոսկերչական ընկերությունը ստեղծել է այն ժամանակների ամենաթանկարժեք զգեստը՝ զարդարված 100.000 մարգարիտով: Այժմ զգեստի արժեքը կես մլն դոլար է:

3. Օդրի Հեփբերն, զգեստը՝ Givenchy, 900.000 դոլար

Առավոտ. Նյու Յորք: «Նախաճաշ Տիֆանիի մոտ» ֆիլմում Օդրի Հեփբերնի հերոսուհին՝ Հոլի Գոլայթլին, սև, երկար զգեստով իջնում է տաքսուց ու մոտենում Tffany & Co խանութի ցուցափեղկին: Այս դրվագից հետո Յուբեր դը Ժիվանշիի կողմից ստեղծված զգեստը դարձավ լեգենդ ու էլեգանտության խորհրդանիշ: 2006թ. դեկտեմբերին այն աճուրդում վաճառվել է 900.000 դոլարով:

2. Նիքոլ Քիդման, զգեստը՝ John Galliano for Christian Dior, 2 մլն դոլար

1997թ. դերասանուհի Նիկոլ Քիդմանն «Օսկար» մրցանակաբաշխությանն է ներկայացել ինքնատիպ զգեստով, որի շնորհիվ դարձել է միջոցառման ամենավառ աստղը: Այժմ այս զգեստը կարող է սովորական թվալ, սակայն այն ժամանակ, այն համարվում էր նորարարական ու մեծ իրարանցում էր առաջացրել: Զգեստի արժեքը 2 մլն դոլար է:

1. Մերիլին Մոնրո, զգեստի արժեքը՝ 5.6 մլն դոլար

«Յոթերորդ տարվա քորը» Մերիլին Մոնրոյի լավագույն ֆիլմերից չէ: Սակայն դրանում կա մի դրվագ, որը հայտնի է ամբողջ աշխարհում: Մերիլինը կանգնում է օդափոխման համակարգի ճաղավանդակին ու տակից փչող օդի հոսքը բարձրացնում է նրա զգեստը՝ ցուցադրելով ոտքերը: Այս դրվագից հետո Մերիլինի ճերմակ զգեստը մեկընդմիշտ իր անունը դաջեց նորաձևության պատմության էջերին: 2011թ. զգեստն աճուրդում վաճառվել է 5.6 մլն դոլարով: