Օդեսայի մարզի վրա ռուսների հարձшկման հետևանքով առնվազն վեց մարդ է վիրավnրվել. Ուկրաինայի արտակարգ իրավիճակների ծառայություն
ՄԻՋԱԶԳԱՅԻՆ
Ուկրաինայի արտակարգ իրավիճակների ծառայությունը, իր հերթին, հաղորդում է Օդեսայի մարզի Չերնոմորսկ քաղաքի վրա ռուսների հարձակման հետևանքով առնվազն վեց վիրավորի մասին: Վնասվել են էներգետիկ ենթակառուցվածքը և վարչական շենք, ինչպես նաև բնակելի շենք, պահեստային տարածքներում հրդեհներ են բռնկվել:
Ժիտոմիրի մարզի իշխանությունները հաղորդել են էներգետիկ ենթակառուցվածքի օբյեկտների և մասնավոր տների վրա ռուսների հարձակումների մասին, զոհվածներ և տուժածներ չկան:
Ռուսաստանի պաշտպանության նախարարությունը հաստատել է հարվածը Չերնոմորսկին՝ պնդելով, թե այնտեղ թիրախավորել են լաստանավային տերմինալը, նավահանգստի ղեկավարության շենքը և էլեկտրական ենթակայան: Ռուս զինվորականները հայտարարել են նաև Սև ծովում բեռնատար նավի և երկու լոկոմոտիվների խոցման մասին:
Ուկրաինայի ռազմաօդային ուժերի տվյաներով՝ գիշերը հակաօդային պաշտպանության ուժերը վնասազերծել են ռուսների հարյուրից ավելի անօդաչու թռչող սարք, սակայն շուրջ երկու տասնյակ վայրերում հարվածները հասել են թիրախներին:
Անցած մեկ օրում հարվածներ են հասցվել նաև Ուկրաինայի ճակատամերձ տարածաշրջաններին: Զապորոժիեի մարզում տուժել է շուրջ երեք տասնյակ մարդ, Խարկովի և Դոնեցկի մարզերում՝ առնվազն 18-ը:
