Ուկրաինան առանցքային դեր է խաղում Հյուսիսատլանտյան դաշինքում, որտեղ նա պետք է զբաղեցնի իր լիարժեք տեղը. Մակրոն
ՔԱՂԱՔԱԿԱՆՈՒԹՅՈՒՆ
Ֆրանսիայի նախագահ Էմանուել Մակրոնը, եռակողմ բանակցությունների ֆոնին, որոնց Եվրոպայի ներկայացուցիչները հրավիրված չեն եղել, պահանջել է Ուկրաինային ընդունել ՆԱՏՕ։
«Ուկրաինան առանցքային դեր է խաղում Հյուսիսատլանտյան դաշինքում, որտեղ նա պետք է զբաղեցնի իր լիարժեք տեղը»,- գրել է նա X սոցիալական ցանցում։
Նա նաև կոչ է արել Եվրոպային իր ներդրումն ունենալ «արդար և կայուն» խաղաղության հաստատման աշխատանքներում։
Այս հայտարարությունը հնչել է հենց ՆԱՏՕ-ի ներսում առկա դիրքորոշմանը հակառակ։ Մասնավորապես, ռազմական դաշինքի գլխավոր քարտուղար Մարկ Ռյուտեն հուլիսի 2-ին նշել էր, որ ներկայումս Ուկրաինայի՝ Հյուսիսատլանտյան դաշինքին անդամակցելու հեռանկարներ չկան։ Նույն մասին նա խոսել էր նաև մարտին։ Իր հերթին ԱՄՆ փոխնախագահ Ջեյ Դի Վենսը նույնպես հայտարարել էր, որ Ուկրաինան չպետք է լինի այդ կազմակերպության անդամ։
Սպիտակ տան ղեկավարի հատուկ ներկայացուցիչներ Սթիվ Ուիթքոֆը և Ջարեդ Քուշները հինգշաբթի առավոտյան ժամանել են Մոսկվա՝ Ռուսաստանի, ԱՄՆ-ի և Ուկրաինայի միջև Աբու Դաբիում կայացած եռակողմ բանակցություններին մասնակցելուց հետո։
Կրեմլում նրանք հանդիպել են նախագահ Վլադիմիր Պուտինի հետ։ Զրույցի ընթացքում նա հիշեցրել է ՆԱՏՕ-ի չընդլայնման և Ռուսաստանի սահմանների մոտ երկիրը վտանգող զինատեսակների համակարգեր չտեղակայելու կարևորության մասին։ Պետության ղեկավարը նաև նշել է, որ Մոսկվան նպատակ ունի հասնել երկարաժամկետ խաղաղության։
Դրանից առաջ նա հայտարարել էր, որ Ուկրաինայի չեզոք կարգավիճակը շարունակում է մնալ Ռուսաստանի նպատակներից մեկը՝ հիշեցնելով, որ այդ դրույթն ամրագրված է Ուկրաինայի պետական ինքնիշխանության հռչակագրում։
