Իրանից հիշեցրել են Հայաստանին Թրամփի նախագծի պատճառով «ոտքերը կոտրելու» սպառնալիքի մասին

Իրանը կոշտ կպատասխանի, եթե ԱՄՆ-ը հատի իր կարմիր գիծը Հայաստանի հարցում, իրանական Ettela'at թերթի համար սյունակում հայտարարել է Իրանի Իսլամական Հանրապետության գերագույն առաջնորդի միջազգային հարցերով խորհրդական Ալի Աքբար Վելայաթին, գրում է rbc.ru–ն։ Նա քննադատել է Հայաստանի վարչապետ Նիկոլ Փաշինյանին և մեղադրել նրան Արևմուտքից «կախվածության աճի» մեջ, ինչը «միայն կարող է  հանգեցնել Հայաստանի բաժանման և խնդիրների»։ Վելայաթին պնդել է, որ Երևանի քաղաքականությունը «բացում է թշնամանքի և լարվածության նոր գլուխ Հարավային Կովկասում»։ Նա հատկապես ընդգծել է Զանգեզուրի միջանցքի «Թրամփի ճանապարհ» վերանվանման ծրագիրը ասելով, որ Թեհրանն իրեն պատասխանատու է համարում Հարավային Կովկասի անվտանգության պահպանման համար, որը հնագույն ժամանակներից ի վեր Իրանի համար ծառայել է որպես անվտանգության բուֆեր։ «Ես ուղղակիորեն և միանշանակ ասացի Հայաստանի դեսպանին. եթե [ԱՄՆ նախագահ Դոնալդ] Թրամփը և նրա դաշնակիցները փորձեն հատել այս իրանական կարմիր գիծը, մենք կկոտրենք նրանց ոտքերը։ Անցյալ շաբաթվա վերջին Հայաստանի խորհրդարանը հաստատեց այդ միջանցքի կառուցումը։ Ի՞նչ է սա նշանակում», - գրել է Վելայաթին։

Զանգեզուրի միջանցքը (ԱՄՆ-ում հայտնի է որպես TRIPP) Ադրբեջանի մայրցամաքային մասի և Նախիջևանի միջև երթուղի է Հայաստանի ամենահարավային Սյունիք նահանգով։ Նախիջևանը, իր հերթին, սահմանակից է Ադրբեջանի դաշնակից Թուրքիային։

Հոկտեմբերի վերջին Հայաստանի խորհրդարանը վավերացրել է ԱՄՆ-ի հետ TRIPP նախագծի վերաբերյալ ռազմավարական համագործակցության շրջանակային համաձայնագիրը։ Իրանը դեմ է այդ համաձայնագրին և միջանցքի անվանափոխությանը։

Նյութը հրապարակման պատրաստեց Կամո Խաչիկյանը

www.1or.am