Հարվшծներ են հասցվել Ուկրաինայի էներգետիկ օբյեկտներին. 300 հազար ընտանիք առանց հոսանքի է մնացել. Զելենսկի
ՄԻՋԱԶԳԱՅԻՆ
Ուկրաինայի էներգետիկ օբյեկտներին ռուսների հարվածների հետևանքով շուրջ 300 հազար ընտանիք, որից 200 հազարը՝ Դնեպրոպետրովսկի, 80 հազարը՝ Կիևի մարզերում, մնացել է առանց էլեկտրականության, այսօր հայտարարել է երկրի նախագահ Վլադիմիր Զելենսկին:
Գիշերը ռուսական զորքերի անօդաչու թռչող սարքերը հարձակվել են Խարկովում մասնավոր սեկտորի վրա: Ինչպես հաղորդում է Ուկրաինայի արտակարգ իրավիճակների պետական ծառայությունը, հինգ մարդ վիրավորվել է: Վնասվել է 10 մասնավոր տուն, ինչպես նաև տնտեսական շինություններ և ավտոմեքենա:
Կիևի մարզում անօդաչուների գիշերային գրոհի հետևանքով երկու մարդ է տուժել; Վնասվել են մասնավոր տուն և տնտեսական շինություն, հաղորդել է մարզային վարչակազմի ղեկավար Տիմուր Տկաչենկոն:
Գիշերը Կիևի քաղաքապետ Վիտալի Կլիչկոն հայտարարել է, որ կենսական նշանակության ենթակառուցվածքին ռուսական անօդաչուների հասցրած հարվածի հետևանքով քաղաքի երեք շրջաններ և Դնեպր գետի աջ ափը մնացել են առանց ջրի:
Սումիի շրջանում անօդաչուն հարվածել է բնակելի տան, նախնական տվյալներով՝ տուժել է մեկ մարդ: Վնասվել են նաև ոչ բնակելի շինություններ և տրանսպորտային միջոցներ, հրդեհներ են բռնկվել, հաղորդել է Արտակարգ իրավիճակների պետական ծառայությունը:
Դնեպրոպետրովսկի մարզում հարձակումների է ենթարկվել էներգետիկ ենթակառուցվածք: ДТЭК էներգետիկ ընկերության տվյալներով՝ լրջորեն վնասվել են էներգետիկ սարքավորումներ, առանց էլեկտրականության է մնացել Դնեպր և Կամենսկի քաղաքների զգալի մասը:
Ուկրաինայի զինված ուժերի ռազմաօդային ուժերը հաղորդում են, որ գիշերվա ընթացքում երկիրը գրոհել են 134 ռուսական անօդաչու թռչող սարքեր, դրանցից 105-ը խոցվել են:
