«Հայաստանի բնությունը ոսկի արդյունահանողների «ապահով» ձեռքերում է»

Հոկտեմբերի 19-ից 30-ը Երևանում ընթանում է ՄԱԿ-ի Կենսաբանական բազմազանության մասին կոնվենցիայի կողմերի համաժողովի 17-րդ նստաշրջանը: Հայաստանի իշխանությունների համար դա հիանալի հնարավորություն է իրենց երկիրը աշխարհին ներկայացնելու, իսկ տեղացի բնապահպանների համար ցույց տալու, թե ինչպես կարող են խոշոր բիզնեսները՝ պետական ​​աջակցությամբ, զոհաբերել Հարավային Կովկասի բնությունը հանուն առասպելական շահույթի, գրում է ng.ru–ն:

COP17-ին մասնակցում է մոտ 15,000 մարդ: Երևանը հյուրընկալել է աշխարհի առաջնորդներին դեռ համաժողովի նախորդ օրը: Մասնավորապես, ՄԱԿ-ի գլխավոր քարտուղար Անտոնիո Գուտերեշն էր հոկտեմբերի 15-ին այցելել Երևան։

Միևնույն ժամանակ, մոտ 70 հասարակական կազմակերպություններ և ՀՀ քաղաքացիներ համատեղ հայտարարություն են տարածել դատապարտելով Ամուլսարի ոսկու հանքի շահագործման մեկնարկը։ Նրանք պահանջում են անհապաղ դադարեցնել հոկտեմբերի 10-ին բացված հանքի գործունեությունը և մեղադրում են Նիկոլ Փաշինյանի կառավարությանը անպատասխանատվության մեջ։ Հայտարարության հեղինակների կարծիքով, ցիանիդի վրա հիմնված ոսկու արդյունահանումը և թթվային դրենաժը վտանգ են ներկայացնում Արփա և Որոտան գետերի, Սևանա լճի, Ջերմուկի և նրա հանգստավայրի հանքային ջրերի համար։

«Ես խորապես ցավում եմ, որ հայտնի հանքը սկսել է շահագործվել... «Իմ քայլը» շարժման ժամանակ (որը նախորդել է Հայաստանի իշխող «Քաղաքացիական պայմանագրին») այդ հարցի շուրջ շատ բանավեճեր եղան: Արդյունքում, «Իմ քայլը» շարժման բնապահպանական թևը և մյուս բնապահպանները չկարողացան համաձայնության գալ, և մենք ունենք այն, ինչ ունենք: Մինչդեռ, հանքի օգտին փաստարկները, որոնք այն ժամանակ որոշ չափով տրամաբանական էին թվում, այսօր կորցրել են իրենց արդիականությունը: Այսօր, երբ մենք ապրում ենք խաղաղության մեջ և սպասում ենք ճանապարհաշինության և նոր ներդրումների, այն փաստարկը, որ «մեզ հանքեր են պետք զենք գնելու համար», այլևս չէ աշխատում: Մենք չենք ասում, որ բոլոր գործող հանքերը պետք է միանգամից փակվեն, բայց գոնե նորերը չպետք է բացվեն», - կարծիք է հայտնել քաղաքագետ Միքայել Զոլյանը։ Նրա խոսքով հանքի բացումը աշխարհին ազդանշան է ուղարկում, որ Հայաստանը մնում է աղքատ և անկայուն երկիր, որը չի զարգանում, այլ գոյատևում է, քանի որ հանքարդյունաբերությունը սովորաբար տիպիկ է երրորդ աշխարհի երկրներին։ Նա նաև հանքարդյունաբերությունը համեմատել է «երիկամի վաճառքի» հետ։

Ավելին, COP17-ի պաշտոնական մեկնարկից մի քանի օր առաջ էլ վարչապետ Նիկոլ Փաշինյանը հյուրընկալել էր «Հայկական հանքարդյունաբերության ֆորում 2026»-ը։ Միջոցառման ժամանակ ելույթ ունենալով նա նշել էր, որ չնայած ոլորտը մեծ հնարավորություններ է առաջարկում, կան նաև մարտահրավերներ, այդ թվում բնապահպանական։ Սակայն, իր դիտարկումներով, որքան շատ մարդիկ են տեսնում  հանրային օգուտը, այնքան ավելի դրական է դառնում նրանց վերաբերմունքը հանքերի նկատմամբ։

Նյութը հրապարակման պատրաստեց Կամո Խաչիկյանը

www.1or.am