Աշխարհի ամենահարուստ ֆուտբոլիստը մնացել է առանց ակումբի
ՍՊՈՐՏ
Բրունեյի սուլթանի եղբորորդի Ֆաիք Բոլկիահը, որի կարողությունը գնահատվում է շուրջ 20 միլիարդ դոլար, ժամանակին համարվում էր աշխարհի ամենահարուստ ֆուտբոլիստը։
Նա մանկուց զբաղվել է ֆուտբոլով, մարզվել «Սաութհեմփթոնի», «Արսենալի» և «Չելսիի» ակադեմիաներում, իսկ 18 տարեկանում պայմանագիր կնքել «Լեսթերի» հետ։
Բայց երեք մրցաշրջանի ընթացքում Բոլկիահին չի հաջողվել նորամուտը նշել անգլիական ակումբի հիմնական կազմում։
Անգլիայից հեռանալուց հետո Բոլկիահը կարիերան շարունակել է Պորտուգալիայի «Մարիտիմուում», իսկ ավելի ուշ տեղափոխվել Թաիլանդ։ «Չոնբուրիի» կազմում նա երկու մրցաշրջանում անցկացրել է 32 հանդիպում՝ խփելով երկու գոլ և կատարելով չորս գոլային փոխանցում։ Այնուհետև նա միացել է «Ռատչաբուրիին», որի կազմում 23 խաղում դարձել է երկու գոլի և մեկ գոլային փոխանցման հեղինակ։
Այժմ 28-ամյա Բոլկիահը որևէ ակումբի հետ պայմանագիր չունի։ Transfermarkt-ը նրա արժեքը գնահատում է 100 հազար եվրո։
Վերջին մրցաշրջաններից առաջ ֆուտբոլիստը նաև ծանր վնասվածք է ստացել և երկար ժամանակ վերականգնվել, իսկ վերջին մեկ տարվա ընթացքում սոցիալական ցանցերում ֆուտբոլին վերաբերող հրապարակումներ գրեթե չի արել։
Հայտնի չէ՝ Բոլկիահը կշարունակի՞ պրոֆեսիոնալ կարիերան, թե՞ կհեռանա մեծ ֆուտբոլից։
